سوال

ختم قرآن میں پیسے لینا کیسا ہے ؟ایک شخص خود مانگ کر پیسے نہیں لے رہا۔

جواب

اگر سوال نماز تراویح میں ختم قرآن سے متعلق ہے تو اس کا جواب یہ ہے کہ :تراویح میں قرآنِ مجید سناکر اجرت لینا اور لوگوں کے لیے اجرت دینا جائز نہیں ہے،  لینے اور دینے والے  دونوں گناہ گار ہوں گے اورثواب بھی نہیں ملے گا،اس حالت میں بہترہےکہ ''الم ترکیف'' سےتراویح پڑھادی جائے، اس سےبھی تراویح کی سنت ادا ہوجائےگی۔

البتہ اگر حافظ کو رمضان المبارک کے لیے نائب امام بنادیا جائے اور اس کے ذمہ ایک یا دو نمازیں  سپرد کردی جائیں اور اس خدمت کے عوض تنخواہ کے عنوان سے اسے کچھ دے دیا جائے (خواہ وہ زیاہ دہو یا کم) تو اس کے لینے اور دینے کی گنجائش ہوگی ۔ اسی طرح اگر بلاتعیین کچھ دے دیاجائےاورنہ دینے پرکوئی شکایت بھی نہ ہو اور نہ وہاں بطورِ اجرت لینے دینے کا عرف ورواج ہوتو یہ صورت اجرت سےخارج اورحدجوازمیں داخل ہوسکتی ہے۔ (کفایت المفتی ،3/،410۔395)

اگر سوال سے مقصود اس کے علاوہ ہے تو وضاحت کے ساتھ لکھ کر دوبارہ دریافت کرلیں۔

فقط واللہ اعلم