سوال

گھر میں جگہ جگہ تھوکنے کی وعیدیں اور نقصانات کیا ہیں ؟ میں نے کسی کو اس حرکت سے روکنا ہے ۔ 

جواب

صفائی ستھرائی ہمارے دین کا حصہ ہے ، رسول اللہ ﷺنے طہارت کو نصف ایمان قرار دیا ہے ، لہذا کسی شخص کا گھر میں جگہ جگہ تھوکنا اخلاق وآداب کے منافی ہے ، اس عمل سے ہر فرد کو اجتناب کرنا چاہیے، تھوکنے کی حاجت ہو تو اس کے لیے کسی ایسی چیز کا انتظام کرلینا چاہیے جس میں تھوکنے سے فرش یا دیواریں آلودہ نہ ہوں۔نیز قبلہ کی جانب تھوکنا ہر حال میں ناجائز ہے چاہے گھر ہو یا اس کے علاوہ کوئی اور مقام ، اس لیے قبلہ کی جانب تھوکنے سے بہر صورت اجتناب کرنا لازم ہے ۔ 

مسلم شریف میں ہے :

"عن أبى مالك الأشعرى رضی اللہ عنہ قال قال رسول الله -صلى الله عليه وسلم- « الطهور شطر الإيمان والحمد لله تملأ الميزان. وسبحان الله والحمد لله تملآن - أو تملأ - ما بين السموات والأرض والصلاة نور والصدقة برهان والصبر ضياء والقرآن حجة لك أو عليك كل الناس يغدو فبائع نفسه فمعتقها أو موبقها »."

(ج:1،ص؛140،ط:دارالجیل بیروت)

"ترجمہ: حضرت ابومالک اشعری  رضی اللہ عنہ سے روایت ہے کہ رسول اللہ ﷺنے فرمایا :طہارت نصف ایمان کے برابر ہے اور اَلْحَمْدُ لِلَّهِمیزان(عدل) کو بھر دے گا اورسُبْحَانَ اللَّهِ وَالْحَمْدُ لِلَّهِسے زمین و آسمان کی درمیانی فضا بھر جائے گی اور نماز نور ہے اور صدقہ دلیل ہے اور صبر روشنی ہے اور قرآن تیرے لئے حجت ہوگا یا تیرے خلاف ہوگا ۔ہر شخص صبح کو اٹھتا ہے اپنے نفس کو فروخت کرنے والا ہے یا اس کو آزاد کرنے والا ہے۔"

حدیث شریف میں ہے:

"عن زر بن حبيش عن حذيفة، أظنه عن رسول الله صلى الله عليه وسلم قال: «من تفل تجاه القبلة جاء يوم القيامة تفله بين عينيه، ومن أكل من هذه البقلة الخبيثة فلا يقربن مسجدنا» ثلاثًا".

" يعني سیدنا حذیفہ رضی اللہ عنہ سے منقول ہے راوی کا خیال ہے کہ وہ رسول اللہ صلی اللہ علیہ وآلہ وسلم سے روایت کرتے ہیں کہ آپ نے فرمایا کہ ' جس شخص نے قبلہ رخ تھوک دیا وہ قیامت کے دن اس حال میں آئے گا کہ اس کا تھوک اس کی دونوں آنکھوں کے درمیان (پیشانی پر) ہوگا اور جو شخص یہ ناپسندیدہ سبزی (لہسن یا پیاز) کھائے تو وہ ہماری مسجد کے قریب نہ پھٹکے"  آپ نے یہ بات تین  دفعہ ارشاد  فرمائی ۔"

(سنن ابوداؤد:کتاب الاطعمۃ،باب فی اکل  الثوم، الرقم: 3824 ،3/ 360 ،ط: المکتبۃ العصریۃ)

فتح الباری میں ہے :

"وهذا التعليل يدل على أن البزاق في القبلة حرام سواء كان في المسجد أم لا، ولا سيما من المصلي فلايجري فيه الخلاف في أن كراهية البزاق في المسجد هل هي للتنزيه أو للتحريم، وفي صحيحي ابن خزيمة و ابن حبان من حديث حذيفة مرفوعًا: من تفل تجاه القبلة جاء يوم القيامة وتفله بين عينيه".

(فتح الباری     ،كتاب الصلاة،باب حك البزاق باليد من المسجد،1/ 508  ط:دارالمعرفۃ)

فقط واللہ اعلم