سوال

طلاق  کے بعد جو  چیزیں لڑکے  والے  لڑکی کو  بری پر دیتے ہیں جس میں کپڑے، زیورات  وغیرہ ان پر کس کا حق ہوتا ہے؟  جب کہ لڑکی والوں نے وہ تمام چیزیں جو لڑکے کو  دی تھیں  لے لی ہیں۔ نیز وہ تحفے جو لڑکے کے بھائی، بہن، ماں وغیرہ دیتے ہیں، اس پر کس کا حق ہوتا ہے؟

جواب

لڑکے والوں کی طرف سے جو عام  استعمال کی چیزیں مثلاً کپڑے ، جوتے ، گھڑی وغیرہ لڑکی کو  دی جاتی ہیں  وہ سب لڑکی کی ملکیت ہوتی ہیں،  اسی طرح منہ دکھائی کے موقع پر جو چیز دی جائے یا بطورِ مہر جو چیز دی جائے،  یہ سب  بھی لڑکی  ہی کی ملکیت ہے۔

اور  لڑکی کو  نکاح کے موقع پر مہر کے علاوہ جو  زیورات سسرال والوں کی طرف سے ملتے ہیں، ان میں یہ تفصیل ہے کہ اگر  زیورات دیتے وقت  سسرال والوں نے اس بات  کی صراحت کی تھی کہ یہ  بطورِ عاریت یعنی صرف  استعمال کرنے کے لیے ہیں  تو  پھر یہ  زیورات لڑکے والوں کی ملکیت ہوں گے، اور اگرسسرال والوں نےہبہ ، گفٹ اور  مالک بناکر دینے کی صراحت کردی تھی تو پھر ان زیورات  کی مالک لڑکی ہوگی، اور اگر  زیورات دیتے وقت کسی قسم کی صراحت نہیں  کی تھی   تو پھر لڑکے کے خاندان کے عرف کا اعتبار ہوگا، اگر ان کا عرف و رواج بطورِ ملک دینے کا ہے  یا ان کا کوئی رواج نہیں ہے تو ان دونوں صورتوں میں زیورات کی مالک لڑکی ہوگی، اور اگر  بطورِ عاریت دینے کا رواج ہے تو پھر سسرال والے ہی مالک ہوں گے۔

باقی لڑکی والوں نے اگر اپنا سب کچھ دیا ہوا واپس لے لیا تو اس سے مسئلہ پر کوئی فرق نہ پڑے گا، گو بطور ہدیہ دینے کے بعد انہیں واپس نہیں لینا چاہیے۔

فتاوی شامی میں ہے:

"كل أحد يعلم الجهاز للمرأة إذا طلقها تأخذه كله، وإذا ماتت يورث عنها".  (3/158، باب المہر، ط؛سعید)        

و فیه أیضاً:

"قلت: ومن ذلك ما يبعثه إليها قبل الزفاف في الأعياد والمواسم من نحو ثياب وحلي، وكذا ما يعطيها من ذلك أو من دراهم أو دنانير صبيحة ليلة العرس ويسمى في العرف صبحة، فإن كل ذلك تعورف في زماننا كونه هدية لا من المهر، ولا سيما المسمى صبحة، فإن الزوجة تعوضه عنها ثيابها ونحوها صبيحة العرس أيضاً."

(3/ 153،  کتاب النکاح، باب المہر، ط: سعید)

وفیہ أیضاً:

"و المعتمد البناء على العرف كما علمت."

(3/157، باب المہر، ط: سعید)        

فتاوی عالمگیری  میں ہے:

"وإذا بعث الزوج إلى أهل زوجته أشياء عند زفافها، منها ديباج فلما زفت إليه أراد أن يسترد من المرأة الديباج ليس له ذلك إذا بعث إليها على جهة التمليك، كذا في الفصول العمادية."

(1 / 327، الفصل السادس عشر فی جہاز البنت، ط: رشیدیہ)

فقط واللہ اعلم