سوال

بیوی نے شوہر سے کہا کہ مجھے طلاق دے دو اور شوہر نے کہا "او کے" تو طلاق واقع ہو گئی؟

جواب

صورتِ مسئولہ میں جب بیوی نے شوہر سے کہا کہ ’’مجھے طلاق  دو‘‘، اور شوہر نے کہا کہ:’’اوکے‘‘، تو ان  الفاظ سے بیوی پر کوئی طلاق واقع نہیں ہوئی، نکاح بدستور قائم ہے۔

اگر  شوہر  نے " اوکے " کے بعد  کہا کہ میں نے طلاق دے دی ،تو اگر عورت مدخولہ  ہے ،یعنی نکاح کے بعد رخصتی  یا خلوت صحیحہ ہوچکی ہےتو ان الفاظ سے ایک طلاق رجعی  واقع  ہوگئی ،جس میں دورانِ عدت  رجوع کی گنجائش ہے (بشرطیکہ اس سے پہلے مزید کوئی طلاق نہ دی ہو)،رجوع کرنے کی صورت میں نکاح بحال رہے گا، اور  اگر عورت غیر مدخول بہا ہےتو پھر ایک طلاق بائنہ ہوکر نکا ح ٹوٹ جائے گا،اس صورت میں گھر بسانے کے لیے نکاح کی تجدید ضروری ہوگا،بہرحال رجوع یا تجدید نکاح ،دونوں صورتوں میں شوہر آئندہ کے لیے دو طلاق کا مالک  رہے گا۔

فتاوی عالمگیری میں ہے:

"امرأة قالت لزوجها تريد أن أطلق نفسي فقال الزوج ‌نعم فقالت المرأة طلقت إن كان الزوج نوى تفويض الطلاق إليها تطلق واحدة وإن عنى بذلك طلقي نفسك إن استطعت لا تطلق."

(کتاب الطلاق،الباب الثالث في تفويض الطلاق،الفصل الثالث،ج:1،ص:402،ط:دار الفکر)

فتاویٰ شامی میں ہے: 

"(‌كنايته) عند الفقهاء (ما لم يوضع له) أي الطلاق (واحتمله) وغيره (ف) الكنايات (لا تطلق بها) قضاء (إلا بنية أو دلالة الحال) وهي حالة مذاكرة الطلاق أو الغضب."

(کتاب الطلاق، باب الکنایات، ج: 3، ص: 296، ط: سعید)

 فقط واللہ اعلم