سوال

میں ایک سرکاری سکول ٹیچر ہوں،ہمارے اساتذہ کرام بچوں کو خوب پڑھاتے ہیں اور روزانہ کے اسباق میں کوئی کمی نہیں کرتے، البتہ بچوں کی تھکاوٹ اور گرمی کی بنیاد پر ہیڈ ماسٹر کی اجازت سے تقریبا ً25 منٹ پہلے چھٹی کرتے ہیں، کیا اس مجبوری کی بنا پر ایسا کرنا جائز ہے، کیوں کہ حکومت کی طرف سے اس کی بالکل اجازت نہیں؟

جواب

 کسی بھی ادارے کے  ملازمین کی حیثیت اجیرِ خاص کی ہوتی ہے،  کیوں کہ وہ وقت کے پابند ہوتے ہیں، اور  اجیرِ  خاص  ملازمت کے مقررہ وقت پر حاضر رہنے سے اجرت (تنخواہ)  کا مستحق ہوتا ہے، اگر وہ  ملازمت کے اوقات میں  حاضر نہیں  رہا  تو اس   غیر حاضری کے بقدر تنخواہ  کا وہ مستحق نہیں ہوتا؛لہذا صورت ِ مسئولہ میں جب حکومت کی طرف  25 منٹ پہلے چھٹی  دینے کی اجازت نہیں ہے تو مذکورہ اسکول والوں کے لیے وقت سے پہلے چھٹی دینا  اور عملہ کا اس وقت کے بقدر  تنخواہ لینا شرعاً جائز نہیں ۔

فتح القدير للكمال ابن الهمام  میں ہے :

"أن ‌الأجير ‌الخاص هو الذي يستحق الأجر بتسليم نفسه في المدة ، وإن لم يعلم كمن استؤجر شهرا للخدمة أو لرعي الغنم."

(كتاب الإجارۃ، باب إجارۃ العبد، ج:9،ص:140، ط: شركة مكتبة ومطبعة مصفى البابي الحلبي وأولاده بمصر)

فتاوی عالمگیری میں ہے:

"ثم الأجرة تستحق بأحد معان ثلاثة إما بشرط التعجيل أو بالتعجيل أو باستيفاء المعقود عليه فإذا وجد أحد هذه الأشياء الثلاثة فإنه يملكها، كذا في شرح الطحاوي."

(کتاب الإجارۃ، الباب الثانی متی تجب الأجرۃ، ج:4، ص:423، ط:ماجدية)

فقط واللہ اعلم