سوال

  ایک شخص محکمہ تعلیم میں ملازم ہے ،اور وہ ایک ہائی سکول میں تعینات ہو ،اور نظام کچھ ایسا ہے کہ ”ہائی سکول“ کے اختیارات محکمہ نے اس کے ”ہیڈماسٹر “کے حوالہ کیے ہوئے ہیں ،پھر تنخواہ کا معاملہ ہو یا غیر حاضری وغیرہ ،تمام کا تمام کا اختیار ہیڈ ماسٹر کے پاس ہے،جس کو ڈی ڈی او بنایا گیا ہے۔ اس کو اختیار ہوتا ہے کہ وہ ملازم کی تنخواہ کاٹ بھی سکتا ہے اور بند بھی کرسکتا ہے ، ملازم کی شکایت محکمہ بالا کو ارسال کر کے ملازم کا ٹرانسفر یا فارغ کرسکتا ہے ۔

اگر ایک ملازم( جس کا ڈی ڈی او، ہائی سکول کا ہیڈماسٹر ہے)  ڈی ڈی او کی اجازت سے سکول کے اوقات میں کمی کرے، ہیڈماسٹر کی اجازت سے وہ وقت مدرسہ یا کسی اور مصرف میں صرف کرے، لیکن اس وقت میں ڈی ڈی او کی مکمل اجازت ہو ،تو کیا وہ وقت جو ملازم نے کسی اور جگہ صرف کرے تو اس ٹائم کی تنخواہ اس کے لئے جائز ہے یا نہیں؟ اور اس اجازت کی کیا حیثیت ہوگی؟ اگر چہ محکمہ نے ان کو محدود اختیارات مستقل بنیاد پر دے رکھے ہوں، اور وہ اپنے اختیارات استعمال کرنے میں صاحب اختیار ہو۔ 

جواب

واضح رہے کہ سرکاری ملازمین اجیر خاص ہوتے ہیں یعنی مخصوص اور متعین اوقات  میں ہر حال میں ادارے کو  خدمات فراہم کرنے کے مستقلاً  پابند ہوتے ہیں، البتہ عارضی بنیاد پر  کسی مجبوری کے پیش نظر  ان کے لیے رخصت لینے کی گنجائش ہوتی ہے، اسی طرح سرکاری محکمہ کے ذمہ داران    ادارے کی بہتری اور نظم و ضبط برقرار رکھنے کے لیے مقرر کیے جاتے ہیں، نہ کہ قانون شکنی  کے لیے، البتہ ان کو  بھی شرعی طور پر اور   حکومت کی جانب سے   سرکاری  ملازمین کو عارضی بنیاد پر  مجبوری کے پیش نظر  رخصت دینے کی اجازت ہوتی ہے، مستقل بنیاد پر نہیں۔

لہذا صورتِ مسئولہ میں ہائی اسکول کے  ہیڈ ماسٹر  جو کہ ڈی ڈی او بھی ہیں ان کو مستقل بنیاد پر کسی ملازم کو  مخصوص اوقات کی  رخصت دینے کا اختیار نہیں ہے، اور   ان کا اس  طرح مستقل بنیاد پر اسکول کے عملہ میں سے کسی بھی شخص کو  رخصت  دینا اپنے فریضہ ، اور ملک و قوم  کے ساتھ خیانت ہے، نیز  اسکول کے ملازم کے لیے اسکول سے مستقل بنیاد پر مخصوص اوقات کی رخصت لے  کر وہ وقت کسی اور جگہ پر  صرف کرنا اور اس وقت کے بدلہ اسکول سے تنخواہ لینا بھی  شرعاً  جائز نہیں ہے۔