سوال

سحری کا مستحب  وقت  کب شروع ہوتو ہے ؟

جواب

فقہاے کرام نے لکھا ہے کہ رات کو چھ حصوں میں تقسیم کیا جائے تو آخری چھٹے حصے میں سحری کرنا مسنون (مستحب) ہے،  مثلاً رات بارہ گھنٹے کی ہو تو صبح صادق سے پہلے والے دو گھنٹوں میں کسی وقت بھی سحری کرنے سے استحباب پر عمل ہوجائے گا، البتہ صبح صادق کے قریب آخر  وقت میں زیادہ افضل ہوگا۔ تاہم اذان تک نہیں کھاتے رہنا چاہیے، مستند نقشے کے مطابق انتہاءِ سحر کے وقت سے دو چار منٹ پہلے کھانا پینا موقوف کردینا چاہیے۔

صحیح بخاری حضرت زید بن ثابت رضی اللہ  عنہ سے مروی ہے، وہ کہتے ہیں  ہم نے رسول اللہ ﷺ کے ساتھ سحری کی، پھر آپ ﷺ نماز کے لیے اُٹھ گئے،  حضرت انس رضی اللہ عنہ نے حضرت زید بن ثابت رضی اللہ عنہ سے پوچھا کہ (رسول اللہ ﷺ  اور آپ لوگوں نے  جب سحری کی تو) اَذان اور سحری کے درمیان کتنا وقفہ تھا؟ حضرت زید رضی اللہ عنہ نے کہا: پچاس آیتوں کی تلاوت کے بقدر۔ 

اس سے معلوم ہوا کہ انتہاءِ سحر سے کچھ لمحات پہلے سحری موقوف کردینی چاہیے، کیوں کہ رسول اللہ ﷺ نے اَذان سے اتنی دیر پہلے سحری موقوف فرمائی جتنی دیر میں پچاس آیتیں تلاوت کی جاتی ہیں، اور رمضان المبارک میں اَذانِ فجر صبح صادق ہوتے ہی دی جاتی ہے۔

صحيح البخاری میں ہے:

"عن قتادة، عن أنس بن مالك: «أن نبي الله صلى الله عليه وسلم وزيد بن ثابت تسحرا، فلما فرغا من سحورهما، قام نبي الله صلى الله عليه وسلم إلى الصلاة فصلى، قلنا لأنس: كم كان بين فراغهما من سحورهما ودخولهما في الصلاة؟ قال: قدر ما يقرأ الرجل ‌خمسين ‌آية."

(كتاب مواقيت الصلوة، باب وقت الفجر،ج:1، ص: 120، ط: السلطانية۔مصر)

بدائع الصنائع میں ہے:

"والسنة فيها هو التأخير لأن معنى الاستعانة فيه أبلغ. وقد روي عن رسول الله - صلى الله عليه وسلم - أنه قال: «ثلاث من سنن المرسلين: تأخير السحور، وتعجيل الإفطار، ووضع اليمين على الشمال تحت السرة في الصلاة»."

(کتاب الصوم، فصل بيان ما يسن وما يستحب للصائم وما يكره له أن يفعله، ج2، ص105، ط: سعید)

رد المحتار میں ہے:

"(قوله: ويستحب السحور)...جمع سحر ...وهو اسم للمأكول في السحر وهو السدس الأخير من الليل."

(کتاب الصوم، باب مايفسد الصوم وما لا يفسده،ج 2، ص419، ط: سعید)

فتاوی ہندیہ میں ہے:

"التسحر مستحب، ووقته آخر الليل قال الفقيه أبو الليث، وهو السدس الأخير هكذا في السراج الوهاج."

(کتاب الصوم، الباب الثالث فيما يكره للصائم وما لا يكره، ج1، ص200، ط: رشيدية)

فقط والله اعلم