سوال

گھر میں یا ویسے ریسلنگ دیکھنے کا کیا حکم ہے؟ اگر یہ گناہ ہے تو اس کی سنگینی کی کیا کیفیت ہے؟  

جواب

ریسلنگ دیکھنا کئی پہلوؤں سے خرابی کا باعث ہے، مثلًا:

1- انسان اور دیگر جان داروں کی تصاویر ہوتی ہیں، جن کی تصویر سازی تو گناہ ہے ہی، ان کا دیکھنا بھی شرعاً جائز نہیں۔

2- وقت کا ضیاع ہوتا ہے، حال آں کہ وقت کی قدر واہمیت مسلمانوں کے ذہنوں میں ہونی چاہیے۔ 

3- عام طور پر یہ مقابلے گانے باجے پر مشتمل ہوتے ہیں، جن کا سننا شرعاً ناجائز ہے۔

4- ان میں موجود کردار عموماً ایسے لباس میں ہوتے ہیں جس سے لباس کی اہمیت کم ہوتی ہے، نیز نازیبا حرکات بھی ہوتی ہیں، اور اس سب سے عریانیت کو فروغ ملتا ہے۔

5- ریسلنگ میں موجود پرتشدد مناظر سے طبیعت میں شدت پیدا ہوجاتی ہے، جس کے نتائج بے شمار ناگفت بہ واقعات کی صورت میں سامنے آتے رہتے ہیں۔

6- یہ کردار دماغوں پر چھاجاتے ہیں اور اس سے دیکھنے والے کے دل ودماغ پر برے نفسیاتی اثرات پڑتے ہیں۔

مندرجہ بالا تفصیل سے معلوم ہوا کہ ریسلنگ کے یہ مقابلے کئی شرعی مفاسد پر مشتمل ہوتے ہیں، جن میں سے بعض گناہِ کبیرہ کے دائرے میں آتے ہیں، لہذا ایسے مقابلے دیکھنا جائز  نہیں۔ فقط واللہ اعلم