کیا رمضان میں روزے کی حالت میں کھانا فروخت کیا جا سکتا ہے؟ ایسے لوگوں کو جن کا روزہ نہ ہو، اس میں کوئی گناہ تو نہیں ہو گا؟
جو مکلف شخص رمضان المبارک میں بلا عذر روزہ ترک کردےوہ سخت گناہ گار ہے، ایسے شخص کو روزہ کے اوقات میں کھانا فروخت کرنا گناہ کے کام پر تعاون ہے جوکہ ناجائز اور حرام ہے، رمضان المبارک کے احترام کی وجہ سے بھی ضروری ہے کہ رمضان المبارک میں دن کے اوقات میں ریسٹورنٹ وغیرہ بند رکھے جائیں۔
ارشاد باری تعالی ہے:
﴿ وَلَاتَعَاوَنُوْا عَلَى الْإِثْمِ وَالْعُدْوَانِ وَاتَّقُوا اللَّهَ إِنَّ اللَّهَ شَدِيدُ الْعِقَابِ ﴾ [المائدة: 2]
ترجمہ: اور گناہ اور زیادتی میں ایک دوسرے کی اعانت مت کرو ، اور اللہ تعالیٰ سے ڈرا کرو ، بلاشبہ اللہ تعالیٰ سخت سزا دینے والے ہیں۔ (از بیان القرآن) فقط واللہ اعلم
فتوی نمبر : 144108200817
دارالافتاء : جامعہ علوم اسلامیہ علامہ محمد یوسف بنوری ٹاؤن