سوال

اگر کوئی لڑکی اپنے گھر سے بھاگ کر شادی کرنا چاہتی ہو تو ایسی لڑکی کا نکاح پڑھانا کیسا ہے اور نکاح نہ پڑھانا کیسا ہے؟کیا نکاح نہ پڑھانے والا گناہ گار ہوگا یا نہیں؟

جواب

واضح رہے کہ شریعتِ مطہرہ نے لڑکی اور لڑکے دونوں، خصوصاً لڑکی کی حیا، اخلاق، معاشرت کا خیال رکھتے ہوئے ولی کے ذریعے نکاح کا نظام رکھا ہے کہ نکاح ولی کے ذریعے کیا جائے، یہی شرعاً، اخلاقاً اور معاشرۃً  پسندیدہ طریقہ ہے، اسی میں دینی، دنیوی اور معاشرتی فوائد ہیں،  لیکن اگر کوئی  نادان  عاقل بالغ لڑکی  ان فوائد اور پسندیدہ عمل کو ٹھکراکر خود ہی بھاگ کر  گواہوں کی موجودگی میں نکاح کر لے  تو  نکاح درست  ہوجائے گا، لیکن یہ نکاح پسندیدہ طریقہ پر نہیں ہوگا۔ اور غیر کفو میں نکاح ہونے کی صورت میں اولاد ہونے سے پہلے لڑکی کے اولیاء کو فسخ کرانے کا حق ہوگا۔ البتہ  جب شرعی طور پر تمام شرائطِ نکاح موجود ہوں ، حرمت کا کوئی سبب موجود نہ ہو تو ایسا نکاح پڑھانے میں شرعاً کوئی ممانعت نہیں ،نکاح پڑھانے والا گناہ گار نہیں ہوگا۔

الدر المختار میں ہے:

"(فنفذ نكاح حرة مكلفة  بلا) رضا (ولي) والأصل أن كل من تصرف في ماله تصرف في نفسه وما لا فلا۔(وله) أي للولي (إذا كان عصبة) ولو غير محرم كابن عم في الأصح خانية، وخرج ذوو الأرحام والأم والقاضي (الاعتراض في غير الكفء) فيفسخه القاضي ويتجدد بتجدد النكاح (ما لم) يسكت ‌حتى (‌تلد ‌منه) لئلا يضيع الولد."

 (کتاب النکاح ، باب الولی، 3/ ،55،56، سعید)

فقط واللہ اعلم