سوال

میں نے جوانی کےد وران مختلف جگہوں پر کاروبار اور مزدوری کی ہے ،بعض جگہیں اور بندے تو معلوم ہیں کہ جس کے پاس ہم نے مزدوری کی ہےاور بعض معلوم نہیں ہیں۔بہرصورت جب مالک ہم پر ظلم کرتے تو ہم بھی ان کو معاف نہیں کرتے ،ان کے مال سے چھپکے  سے کھاتے اور اٹھاتے تھے،یعنی ہم نے مختلف صورتوں سے لوگوں کا حق کھایا ہے اپنے زعم کے مطابق،تو جولوگ معلوم ہیں ان کا حق ان کو واپس کس طریقہ سے کیا جائے ؟کیونکہ ان بتاکر دینے میں شرم ہوتی ہے،اور جو معلوم نہیں ہیں ان کے حق کا کیا حکم ہے؟کیا طریقہ اختیار کیا جائے؟

جواب

صورت مسئولہ میں مالکوں کی طرف سے سائل پر جو ظلم ہوا تھا اگر وہ مالی ظلم تھا ،مثلاً کبھی   سائل کی اجرت نہیں دی یا بلاوجہ کم دی وغیرہ ،  تو اپنا حق کے بقدر جو مال اٹھایا ہو اس کو واپس کرنے کی ضرورت نہیں ہے ،لیکن اگر سائل نے  اپنے حق سے زیادہ وصول کیا ہو یا ظلم کا تعلق مال سے نہ ہو ،اخلاقیات وغیرہ سے ہو  تو  اس صورت میں( مالکوں کا ظلم کرنا  اگرچہ ناجائز تھا،جس پر  آخرت میں وہ جواب دہ ہوں گے )سائل پر توبہ و استغفار کے ساتھ اپنے مالکان  کو ان کے   مال کی  قیمت لوٹانا ضروری ہے ،جو  لوگ معلوم ہیں ان کو قیمت ادا کرے،جو لوگ معلوم نہیں ہیں تو اپنے ساتھی مزدوروں کے ذریعہ ان کا یا انتقال ہوجانے کی صورت میں ان کے ورثاء کا  پتہ معلوم کرے ،اگر   تلاش کے باوجود معلوم نہ ہو تو ان کی طرف سے صدقہ کردے۔

باقی  اگر  ان کو بتانے میں عار محسوس ہوتی ہویاکسی فساد کا اندیشہ ہوتو یہ بھی گنجائش ہے کہ رقم مالک  کو کسی اور عنوان سے واپس کردے، مثلاً ہدیہ اور تحفہ کے نام سے واپس کردے، یا  کسی سے ان کا بینک اکاؤنٹ معلوم کرکے خاموشی سے  اکاؤنٹ میں رقم ڈالدے،غرض یہ کہ کسی بھی مناسب طریقہ کے ذریعہ ان تک ان کاحق پہنچادے ۔

حدیث شریف میں ہے:

"قال رسول الله صلى الله عليه وسلم: ’’ألالا تظلموا ألا ‌لا ‌يحل ‌مال امرئ إلا بطيب نفس منه ‘‘. رواه البيهقي في شعب الإيمان والدارقطني في المجتبى."

ترجمہ:’’خبردار کسی پر ظلم و زیادتی نہ کرو، خبردار کسی آدمی کی ملکیت کی کوئی چیز اس کی دلی رضامندی کے بغیر لینا حلال اور جائز نہیں ہے ۔‘‘

(مشکوٰۃ المصابیح، باب الغصب والعاریة، الفصل الثانی، ج:2، ص:889،  ط:المكتب الإسلامي - بيروت)