سوال

 امام کے پیچھے  نماز  پڑھنے کی صورت   پیچھے سورۂ فاتحہ پڑھنا کیسا ہے ؟  میں نے کہیں پڑھا تھا کہ سورۂ فاتحہ کے بغیر نماز نہیں ہوتی تو امام کے پیچھے قرات کرنا کیسا ہے ؟اگر نہیں صحیح تو کیا پڑھنا چاہیے۔

جواب

جماعت سے نماز پڑھنے کی صورت میں امام کے پیچھے مقتدی کے لیے  کسی قسم کی  قراءت کرنا خواہ وہ سورہ فاتحہ ہو یا کوئی اور سورت ہو، جائز  نہیں، نیز اس حکم میں سری (ظہر، عصر) اور جہری (فجر، مغرب، عشاء) نمازوں میں کوئی فرق نہیں؛ کیوں کہ امام مقتدیوں کی نماز کا ضامن ہوتا ہے،  لہٰذا نماز خواہ سری ہو یا جہری امام کی قرأت تمام مقتدیوں کی طرف سے کافی ہوگی، مقتدیوں کے لیے الگ سے سورۂ فاتحہ پڑھنا درست نہیں  ہے، البتہ امام اور تنہا نماز پڑھنے والے کے لیے نماز  میں سورۂ فاتحہ  پڑھنے کا حکم ہے۔

قرآن مجید میں باری تعالٰی کا ارشاد ہے:

"وَإِذَا قُرِيَ الْقُرْاٰنُ فَاسْتَمِعُوْا لَهٗ وَانْصِتُوْا لَعَلَّكُمْ تُرْحَمُوْنَ."(سورة الأعراف:204)

ترجمہ:"اور  جب قرآن پڑھا جایا کرے تو اس کی طرف کان لگایا کرو اور خاموش رہا کرو، امید ہے کہ تم پر رحمت ہو۔" (بیان القرآن)

سنن ابن ماجہ میں ہے:

’’عن جابر بن عبد الله قال: قال رسول الله صلي الله عليه وسلم : من كان له إمام، فقراءة الإمام له قراءة.‘‘

(كتاب إقامة الصلاة والسنة فيها، باب: إذا قرأ الإمام فأنصتوا، ج: 1 ص: 227، ط: دار إحياء كتب العربية)

ترجمہ:’’ حضرت جابر بن عبد اللہ رضی اللہ عنہ رسولِ اکرم صلی اللہ علیہ وسلم کا فرمان نقل کرتے ہیں : جس شخص کا کوئی امام ہو تو امام کی قرأت اس کی بھی قرأت ہے۔‘‘

صحیح مسلم میں ہے:

’’عن حیطان بن عبد الله الرقاشي قال: صليت مع أبي موسي الأشعري ... أن رسول الله صلي الله عليه وسلم خطبنا، فبين لنا سنتنا و علمنا صلواتنا فقال: إذا صليتم فأقيموا صفوفكم ثم ليؤمكم أحدكم؛ فإذا كبر فكبروا و إذا قرأ فأنصتوا...‘‘

(كتاب الصلاة، باب التشهد في الصلاة، ج: 1، ص: 304، ط: دار إحياء التراث العربي)

ترجمہ:" حضرت ابو موسیٰ اشعری رضی اللہ عنہ روایت کرتے ہیں کہ رسولِ اکرم صلی اللہ علیہ وسلم نے خطبہ دیا اور ہمیں طریقہ بیان کیا اور ہمیں نماز سکھلائی کہ جب تم نماز ادا کرو تو اپنی صفوں کو درست کرو، پھر تم میں سے کوئی امامت کرائے، پس جب وہ تکبیر کہے تو تم تکبیر کہو اور جب وہ قرأت کرے تو بالکل خاموشی سے سنو۔۔۔ الخ"

مصنف ابن ابی شیبہ میں ہے:

" عَنْ جَابِرٍ ، عَنِ النَّبِيِّ صلى الله عليه وسلم ، قال : كل من كان له إمام، فقراءته له قراءة."

 (کتاب الصلاة، من کره القراءة خلف الإمام،  1/ 377، ط: دار السلفیة الهندیة)

ترجمہ:’’ حضرت جابر رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ہر وہ شخص جس کا امام ہو، اس (امام) کی قراءت اس (مقتدی) کی قراءت ہوگی۔‘‘

فتاوی شامی میں ہے:

"(والمؤتم لا يقرأ مطلقا) ولا الفاتحة في السرية اتفاقا... (فإن قرأ كره تحريما) وتصح في الأصح."

(كتاب الصلاة، فصل في القراءة، 1/ 544، ط: دارالفكر بيروت)

فقط والله أعلم