سوال

مسئلہ  پوچھتے ہوئے  مجھے بھی شرم محسوس ہو رہی ہے، میں ایک ایسا شخص ہوں کہ  مجھے ایک بیماری نے گھیر لیا ہے،  وہ یہ کہ بیوی سے بات کرتے ہی مذی نکل جاتی ہے تو میرے  لیے نماز کا کیا حکم ہے؟ یعنی نماز کس طرح ادا کروں؟

جواب

شہوت کے وقت  مذی  نکلنا  ایک فطری عمل ہے،  خاص کر بیوی سے  بوس كنار  کرتے  وقت  یہ پانی مائل لیس دار مادہ کثرت سے نکلتا ہے جس سے منی کے نکلنے  میں  سہولت پیدا ہوجاتی ہے۔  مذی جب جسم سے نکلے، چاہے شہوت کے وقت نکلے یا شہوت کے بعد نکلے یا بلاشہوت نکل  جائے، اس کے نکلنے سے صرف وضو ٹوٹ جاتا ہے، غسل فرض نہیں ہوتا،  اور کپڑوں اور جسم میں  سے   جس جگہ مذی لگی ہو  نماز کے لیے اسے دھو کر پاک کرنا ضروری ہے، اس کو دھوئے بغیر نماز   جائز نہیں۔ 

حدیث شریف میں ہے:

حضرت علی رضی اللہ عنہ فرماتے ہیں کہ:  مجھے بہت زیادہ مذی آتی تھی، جب مجھے مذی نکلتی، تو میں غسل کیا کرتا، پھر میں نے رسول اللہ صلی اللہ علیہ وسلم سے اس بارے میں سوال کیا، تو آپ علیہ الصلاة والسلام نے فرمایا: اس میں  صرف وضو ہے، غسل نہیں۔

اگر  پتا چلے بغیر مذی کا اخراج ہوجائے تو علم ہونے کے بعد  جس جگہ لگی ہو اس کو دھولے اور اگر اس دوران کوئی نماز پڑھی ہو تو وضو کرکے اس کو دہرالے۔

بخاری شریف میں ہے:

"عن علي قال: كنت رجلًا مذاءً فأمرت رجلًا أن يسأل النبي صلى الله عليه و سلم لمكان ابنته، فسأل، فقال: «توضأ واغسل ذكرك»."

(أخرجه البخاري في «باب غسل المذي والوضوء منه» (1/ 105) برقم (266)،ط. دار ابن كثير ، اليمامة - بيروتالطبعة الثالثة ، 1407=1987)

سنن ابی داود میں ہے:

"عن علي رضي الله عنه قال: كنت رجلا مذاء، فجعلت أغتسل حتى تشقق ظهري، فذكرت ذلك للنبي صلى الله عليه وسلم، أو ذكر له، فقال رسول الله صلى الله عليه وسلم: "لا تفعل، إذا رأيت المذي فاغسل ذكرك وتوضأ وضوءك للصلاة، وإذا فضخت الماء فاغتسل."

(أخرجه أبوداود في سننه في «باب في المذي» (1/ 148، 149) برقم (206)،ط.دار الرسالة العالمية،الطبعة: الأولى، 1430 هـ= 2009 م)

بذل المجھود میں ہے:

"واتفقت العلماء على أن الغسل لايجب لخروج المذي، وعلى أن المذي نجس, وعلى أن الأمر بالوضوء منه كالأمر بالوضوء من البول."

(کتاب الطهارة، باب في المذي (2/ 265)،ط.  مركز الشيخ أبي الحسن الندوي للبحوث والدراسات الإسلامية، الهند، الطبعة: الأولى، 1427 هـ - 2006 م)

فتاوى هنديه  میں ہے:

"المذي ينقض الوضوء."

(الفتاوى الهندية: كتاب الطهارة،الباب الأول في الوضوء،  الفصل الخامس في نواقض الوضوء (1/ 10)،ط. رشيديه،كوئته باكستان)

فقط، واللہ اعلم