مغرب کی نماز میں امام کے ساتھ ہم تیسری رکعت میں شامل ہوں تو باقی دو رکعت ہم کیسے ادا کریں گے؟
صورت مسئولہ میں مغرب کی تیسری رکعت میں شامل ہونے والا شخص اپنی نماز اس طرح مکمل کرے گا کہ وہ امام کے ساتھ تیسری رکعت میں شامل رہے اور امام کے سلام پھیرنے کے بعد وہ قیام کر کے اس میں قرأت کرے (ثناء، تعوذ ،تسمیہ ،سورہ فاتحہ اور کوئی دوسری سورت یعنی ایک لمبی آیت اور تین چھوٹی آیات) پھر رکوع سجدہ کرنے کے بعد قعدہ میں بیٹھ کر صرف تشہد (التحیات) پڑھے، اس کے بعد قیام کر کے اس میں قرأت کرے (سورہ فاتحہ اور کوئی دوسری سورت یعنی ایک لمبی آیت اور تین چھوٹی آیات) اور پھر رکوع سجدہ کرنے کے بعد قعدہ میں تشہد (التحیات) ، درود شریف اور اس کے ساتھ ماثور دعا پڑھ کر سلام پھیر دے۔
فتاوی شامی میں ہے:
"(والمسبوق من سبقه الإمام بها أو ببعضها وهو منفرد) حتى يثني ويتعوذ ويقرأ، وإن قرأ مع الإمام لعدم الاعتداد بها لكراهتها مفتاح السعادة (فيما يقضيه) أي بعد متابعته لإمامه، فلو قبلها فالأظهر الفساد، ويقضي أول صلاته في حق قراءة، وآخرها في حق تشهد»
(قوله أي بعد متابعته لإمامه إلخ) متعلق بقوله يقضيه: أي أن محل قضائه لما سبق به إنما هو بعد متابعته لإمامه فيما أدركه عكس اللاحق كما مر۔"
(کتاب الصلاۃ ، باب الامامۃ ج نمبر ۱ ص نمبر ۵۹۶،ایچ ایم سعید)
فقط واللہ اعلم
فتوی نمبر : 144307102394
دارالافتاء : جامعہ علوم اسلامیہ علامہ محمد یوسف بنوری ٹاؤن