سوال

اگر کسی کے شوہر نے اس سے ہمبستری کر لی اور عورت کو پتہ نہ چلا کہ  اس کو ماہواری آئی ہے اس صورت میں کیا حکم ہے ، ہمبستری کرنے کے بعد پتہ چلا یا ایک دن گزرنے کے بعد شک تھا تو اس کا کیا حکم ہے؟

جواب

واضح رہے کہ حالتِ حیض میں بیوی سے جماع کرنا شرعاً ناجائز و حرام ہے،جس پر سچے دل سے توبہ و استغفار  ضروری ہے،نیز یہ طبی اعتبار سے بھی انتہائی نقصان دہ ہے ،لہذا اس سے اجتناب لازم ہے۔ 

صورتِ مسئولہ میں اگر واقعۃ شوہر اور بیوی کو ماہواری کا علم نہیں تھا اور شوہرنے ہمبستری کر لی تو اس میں دونوں گناہ گار نہ ہوں گےاور اگر کسی بھی ایک کو علم ہونے کے باجود انہوں نے ایسا کیا ہے تو  اس سے وہ   گناہ کبیرہ کا  مرتکب ہوا  ہے،لہذا  اس پر اُنہیں  سچے دل سے توبہ و استغفار اور آ ئندہ کے لیے مکمل اجتناب ضروری  ہے، نیز مذکورہ گناہ کے ازالے کے لیے بہتر یہ  ہے کہ  کچھ صدقہ کرے، تاکہ نیکی سے گناہ دُھل جائے،  استطاعت ہو تو ایک دینار ( یعنی  4.374گرام سونا یا اس کی قیمت، اگر ایام کا خون سرخ ہو) یا آدھا دینار (یعنی  2.187  گرام سونا یا اس کی قیمت، جب کہ خون سرخ رنگ کے علاوہ ہو)  صدقہ کریں۔   ملحوظ رہےکہ مذکورہ صورت میں ایک دینار یا آدھا دینار کا صدقہ کرنا واجب نہیں ہے،اگر استطاعت نہ ہو تو  جس قدر ممکن ہو اتنا صدقہ کردیں، مثلاً  1000 یا 5000 روپے  یا جتنا ہو سکے، تاکہ آئندہ ایسی غلطی نہ ہو۔

فتاوی شامی میں ہے:

"ويندب تصدقه بدينار أو نصفه. (قوله: ويندب إلخ) لما رواه أحمد وأبو داود والترمذي والنسائي عن ابن عباس مرفوعًا «في الذي يأتي امرأته وهي حائض، قال: يتصدق بدينار أو نصف دينار» ثم قيل إن كان الوطء في أول الحيض فبدينار أو آخره فبنصفه، وقيل بدينار لو الدم أسود وبنصفه لو أصفر. قال في البحر: ويدل له ما رواه أبو داود والحاكم وصححه «إذا واقع الرجل أهله وهي حائض، إن كان دما أحمر فليتصدق بدينار، وإن كان أصفر فليتصدق بنصف دينار»."

(كتاب الطهارة، باب الحيض، ج:1، ص:298، ط:ايج ايم سعيد)

فتاویٰ دار العلوم دیوبند میں ہے:

’’(سوال ۳۳۷) اگر کوئی شخص اپنی زوجہ سے حالتِ حیض میں جماع کرے تو اس پر کفارہ لازم آوے گا یا نہ؟(جواب)در مختار میں ہے کہ حالتِ حیض میں اپنی زوجہ سے وطی کرنا حرام اور کبیرہ گناہ ہے، اس کو توبہ کرنا لازم ہے اور ایک دینار یا نصف دینار صدقہ کرنا مستحب ہے، اور ایک دینار ساڑھے چار ماشے سونے کا ہوتا ہے ۔فقط۔‘‘

(فتاوی دارالعلوم دیوبند ، ج:1 ،ص:211 ،ط:دارالاشاعت)

فقط واللہ اعلم