سوال

 بخاری کی ایک روایت ہے حدیث نمبر 6993"مَنْ رَآنِي فِي الْمَنَامِ فَسَيَرَانِي فِي الْيَقَظَةِ، وَلَا يَتَمَثَّلُ الشَّيْطَانُ بِي" یہاں کچھ علماء حضرات کہتے ہیں کہ اکابر علماء دیوبند کا بھی یہی عقیدہ ہے کہ آنحضرت صلی اللہ علیہ وسلم کو یقظہ کی حالت میں بھی دیکھا جا سکتا ہے، کیا یہ صحیح ہے اور کیا اس حالت میں دیکھنے سے بندہ صحابی نہیں بن جائے گا ؟

جواب

بعض اولیاء کرام رحمہم اللہ کو بیداری کی حالت میں رسول اللہ صلی اللہ علیہ وسلم کی زیارت کا ہونا ثابت ہے،قرآن وحدیث کی رو سے یہ بات ناممکن بھی نہیں ،بلکہ مذکورہ حدیث (بعض تشریحات کی بناء پر) میں اس کا اشارہ بھی ملتا ہے،لیکن یہ زیارت خواب کی طرح مثالی صورت کی ہوتی ہے جو عبادات میں کثرت ریاضت اورسنتوں کی اتباع کی بناء پر عشق رسول صلی اللہ علیہ وسلم کے اعلیٰ مرتبہ پر فائز ہونے کی وجہ سے   بصورت کشف ہوتی ہے،بلاشبہ یہ ایک سعادت کی بات ہے،لیکن یہ حقیقی(جسم مع الروح کی) زیارت نہیں ہوتی،لہذا  اس سے کوئی شخص صحابی نہیں کہلائے گا۔

الحاوی للفتاوی میں ہے:

"الثاني: هل الرؤية لذات المصطفى صلى الله عليه وسلم بجسمه وروحه أو لمثاله؟ الذين رأيتهم من أرباب الأحوال يقولون بالثاني وبه صرح الغزالي فقال: ليس المراد أنه يرى ‌جسمه ‌وبدنه بل مثالا له صار ذلك المثال آلة يتأدى بها المعنى الذي في نفسه، قال: والآلة تارة تكون حقيقة وتارة تكون خيالية، والنفس غير المثال المتخيل، فما رآه من الشكل ليس هو روح المصطفى ولا شخصه بل هو مثال له على التحقيق، قال: ومثل ذلك من يرى الله تعالى في المنام فإن ذاته منزهة عن الشكل والصورة، ولكن تنتهي تعريفاته إلى العبد بواسطة مثال محسوس من نور أو غيره، ويكون ذلك المثال حقا في كونه واسطة في التعريف فيقول الرائي: رأيت الله في المنام، لا يعني أني رأيت ذات الله كما تقول في حق غيره. انتهى."

(الفتاوی الصوفیۃ،ج2،ص316،ط؛دار الفکر)

جامعہ کے سابقہ فتاویٰ میں اسی طرح کے ایک سوال کے جواب میں مفتی محمد عبد السلام چاٹ گامی صاحب رحمہ اللہ تحریر فرماتے ہیں:

’’عالمِ بیداری میں حضورِ اکرم ﷺ کو دیکھنا، جب کہ ﷺ وفات پاچکے ہیں، قرآن و سنت سے ثابت نہیں، جب عالمِ بیداری میں آپ ﷺ کے شرفِ زیارت کا ثبوت قرآن و سنت سے نہیں، اس پر دلیل قائم کرنے کی ضرورت نہیں، عالمِ بیداری میں دیکھنا ناممکن بات بھی نہیں، اور جو عالمِ بیداری میں حضور ﷺ کو دیکھنے یا حضور ﷺ سے ملاقات، بات چیت کرنے کا دعویٰ کرتا ہے، نا ممکن کا دعویٰ نہیں کرتا۔

الجواب صحیح                                                                                                                                                                                                                                                                                                                                                                                                                             کتبہ

محمد یوسف بنوری عفا اللہ عنہ                                                                                                                                                                                            محمد عبدالسلام (23/ محرم الحرام 1394ھ)‘‘

محدّث العصر حضرت مولانا محمد یوسف بنوری نور اللہ مرقدہ نے اس جواب کی تصحیح  کے ساتھ ساتھ  اس پر نوٹ لکھا ہے، جو مِن و عَن نقل کیا جاتاہے:

’’میری رائے میں صحیح جواب یہ ہے:

عالمِ بیداری میں حضور ﷺ کو دیکھنا ممنوع نہیں، حدیث یا فقہ میں اس کی ممانعت نہیں، بلکہ ایک حدیث میں ایسا اشارہ ملتا ہے کہ جس نے خواب میں مجھے دیکھا تو (ہوسکتاہے کہ) بیدای میں بھی دیکھ لے۔

اربابِ قلوب اور اہلِ تصوّف کے یہاں تو یہ چیز تواتر کو پہنچی ہے کہ آں حضرت ﷺ اور بعض اَکابر کی زیارت بیداری میں ہوتی رہتی ہے، اگرچہ بیداری کی رؤیت "مثالی رؤیت"  ہے، عالمِ شہادت کی رؤیت نہیں، ورنہ ہر شخص اس وقت دیکھتا، بلکہ خاص مثالی رؤیت ہے، عالمِ مثال کی مثال بھی خواب جیسی ہے۔ البتہ جو خواب میں دیکھ لے وہ "رؤیا" کہلائے گا، اور جو بیداری میں ہوگی وہ "رؤیت" ہوگی۔

ہاں! ضرور خیال رہے کہ اس رؤیت میں ضروری نہیں کہ مرئی (جن کو دیکھا جاتاہے اس) کو علم و خبر ہو، یا اس کے تصرّف و قدرت کو دخل ہو، جیسے خواب میں کسی کو دیکھتا ہے کہ جس کو خواب میں دیکھا یہ حق تعالیٰ کی طرف سے ہے، اس شخص کے ارادے و قدرت، بلکہ علم کو بھی دخل نہیں، اور  چوں کہ رؤیت مثالی ہوتی ہے، اس لیے ایک وقت میں متعدد اَشخاص متعدد مقامات میں دیکھ سکتے ہیں۔ زیادہ تفصیل کا یہ موقع نہیں۔

محمد یوسف بنوری‘‘

فقط واللہ اعلم