سوال

 تکمیلِ حفظ، درجات عالمیت، افتاء، ادب اور قراءت وغیرہ کی دستار بندی کے مواقع پر بعض مقامات میں فرحت و خوشی سے والدین، متعلقین ان فارغین حضرات کے گلے میں نوٹوں اور پھولوں کے ہار ڈالتے ہیں اسی طرح حاجی لوگ جب حج کے لیے گھر سے نکلتے یا حج کرکے واپس گھر پہنچتے تو ان کے متعلقین حضرات ان کے گلے میں نوٹوں اور پھولوں کے ہار ڈالتے ہیں تو اس کا شرعی حکم کیا ہے؟

جواب

مختلف تقریبات کے موقع پر  شریعت کے دائرے میں رہتے ہوئے دوسرے فرد کی خوشی میں شریک ہونا اور اس کی حوصلہ افزائی کرنا نہ صرف جائز بلکہ مستحسن ہے ۔البتہ ایسے موقع پر نوٹوں کے ہار پہننایا پہنانا ایک قابل ترک  رسم ہے ،شریعت  میں اس کی کوئی اصل نہیں اور نوٹوں والا ہار دنیا کی محبت پر دلالت کرتا ہے ۔ اس لیے ان چیزوں سے اجتناب کرنا لازم ہے۔مزید یہ کہ اس میں جاندار کی تصویر ہوتی ہے، اس لئے اس کو پہننے سے باز رہنا چاہئےالبتہ نوٹوں والے ہار کے بجائے نقد رقم ہدیہ کے طور پر دی جائےتو یہ شرعاً جائز ہے۔نیز پھولوں کا ہار پہنانابھی قابل ترک رسم ہے۔

فتاویٰ رحیمیہ میں ہے:

"ختم قرآن کی شب حفاظ کو پھولوں کو ہار پہنایا جاتا ہے، یہ رواج برا اور قابلِ ترک ہے۔اور اس میں اسراف بھی ہے۔۔۔الخ"

(فتاویٰ رحیمیہ، ج:10،ص:200،ط:دارالاشاعت کراچی)

فتاویٰ محمودیہ میں ہے:

"شادی وغیرہ کے موقع پر دولہا وغیرہ کو پھولوں کا ہار پہنانا قرآن پاک، حدیث شریف، آثار صحابہ، فقہ سے کہیں ثابت نہیں۔۔۔۔اس رسم کو بالکل ختم کردیا جائے۔ فقط واللہ تعالیٰ اعلم"۔

 (فتاوی محمودیہ ، ج:22،ص:468۔ط:فاروقیہ کراچی)

(مستفاد  ایضاً من:خیرالفتاویٰ، ج:4،ص:585،ط:مکتبہ امدادیہ ملتان)۔

فقط واللہ اعلم