سوال

جیزکیش اکاؤنٹ استعمال کرنا کیسا ہے؟

جواب

جیز کیش اکاؤنٹ استعمال کرنے کا مقصد رقم کی منتقلی ہو یا موبائل میں ری چارج وغیرہ کرنا، اگر اس اکاؤنٹ میں رقم رکھنے پر  کمپنی کوئی مشروط نفع (مثلاً: فری منٹس، انٹرنیٹ ایم بی ، میسج وغیرہ) نہ دیتی ہو تو  اس حد تک اس اکاؤنٹ کااستعمال درست ہوگا،لیکن  اگر  کمپنی  اکاؤنٹ ہولڈر کو اس مخصوص رقم جمع کرانے کی شرط پر  یومیہ فری منٹس اور میسیجز وغیرہ کی سہولت فراہم کرتی ہو تو ایسی صورت میں اس کا استعمال کرنا ناجائز ہو گا، اس لیے کہ جیز کیش اکاؤنٹ میں رقم رکھوانا درحقیقت  قرض ہے، اور  قرض دینا تو فی نفسہ جائز ہے، لیکن کمپنی اس پر جو  مشروط منافع دیتی  ہے وہ در حقیقت سود ہے؛ اس لیے کہ قرض پر شرط لگا کر نفع  کے لین دین  کو نبی کریم ﷺ نے سود قرار دیا ہے۔ (مصنف بن أبی شیبہ، رقم:۲۰۶۹۰ )اور   چوں کہ اس صورت میں  مذکورہ اکاؤنٹ کھلوانا ناجائز سودی معاہدہ کےساتھ مشروط ہے؛ اس لیے یہ اکاؤنٹ کھلوانا یا کھولنا ہی جائز نہیں ہوگا۔

واضح رہے کہ عموماً ’’ جیز کیش اکاؤنٹ‘‘دوسری صورت کا ہوتاہے؛ لہٰذا ایسا اکاؤنٹ کھلوانا  جائز نہیں  ہوگا، البتہ اگر کمپنی پہلی صورت کے مطابق ''جیز کیش اکاؤنٹ '' کی سہولت دے تو ایسے اکاؤنٹ  کے استعمال کی اجازت ہوگی۔  فقط واللہ اعلم