سوال

میراسوال یہ  ہے کہ میں عربی جملے اور احادیث پرنٹ کرتا ہو ں اور پھر شیشہ  فریم بنانے والوں کے ہا ں بیچتا ہوں،میرےایک عربی جملے  پر ایک خاتون نے اعتراض کیاہےوہ پرنٹ اس طرح ہے " بسم اللہ الرحمٰن الرحیم ماشاءاللہ لاحول ولاقوۃ الا باللہ العلی العظیم"     اس عورت  نے  کہاہے  کہ  یہ غلط ہے ۔اور اس پر اس نے کئی دینی اداروں سے فتاوی بھی لیےہیں ۔لیکن   مجھے آگاہ کرکےاصلاح کا موقع دیے  بغیر تھانہ میں میرے خلاف کاروائی کی ہے، حالانکہ میں ایک سیدھا سادہ مسلمان ہوں،  مجھے علم ہی نہیں تھا  کہ اس طرح نہیں لکھنا چاہیے اب میں اس پر نادم ہوں اور پکا عزم کرتا ہوں کہ آئندہ اس طرح کا پرنٹ نہیں بناؤں گا، اور جن کو دیے  ہیں ان کو بھی شیشہ  فریم بنانے سے روک دو  ں گا۔ کیا مجھے اس غلطی کےازالہ کےلئے کچھ اوربھی  کرنا  ہو گا۔

2.کیا اس سب کچھ  کرنے کے باوجود اس عورت کو حق ہے کہ وہ میرے خلاف تھانہ میں شکایت کرے    یا بلاوجہ پریشان کرے ؟    

                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                           پرنٹ اس طرح ہے                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                           

جواب

جواب سے قبل سوال میں ذکرکردہ کلمات اور جو فریم کی تصویر بھیجی ہے جس پر''بسم اللہ الرحمن الرحیم ماشاء اللہ لاحول ولاقوۃ الا باللہ العلی العظیم''   تحریر ہے اس کا حکم سمجھ لیں۔

اس تحریر میں تین جملے ہیں، سب سے پہلے بسم اللہ الرحمن الرحیم، پھرماشاء اللہاور اخیر میں لاحول ولاقوۃ الاباللہ العلی العظیم۔ ان تینوں جملوں کے  متعدد احادیث میں الگ الگ فضائل وارد ہوئے ہیں،ان میں سے چند  احادیث ذیل میں ذکر کی جاتی ہیں۔

ہر اہم کام کے شروع میں "بسم اللہ الرحمٰن الرحیم" پڑھنا سنت ہے، حدیث شریف میں وارد ہے کہ جو بھی اہم کام "بسم اللہ الرحمٰن الرحیم" کے بغیر شروع کیا جائے تو وہ ناقص اور بے برکت ہوتا ہے، یعنی جس کام کے شروع میں بسم اللہ الرحمٰن الرحیم پڑھ لی جائے تو وہ کام بابرکت ہونے کی وجہ سے پایہ تکمیل تک پہنچ جاتا ہے۔

اسی طرح نظر لگنےکو بر حق کہا گیا ہے،اور اس سے بچاؤ کا عمل بھی سکھایا گیا ہے،چناں چہ حدیث شریف میں وارد ہے کہ’’جس شخص کو کوئی چیز بھائےاور وہ اسے دیکھ کر"ما شاء الله لا قوة إلا بالله"کہہ دے،تواس چیزکو نظرِ بد نقصان نہیں پہنچاتی،اور یہ مضمون،متعدد احادیث میں وارد ہوا ہے۔

البتہ احادیثِ مبارکہ میں،نظرِ بد سے بچنے کے لیے،’’ماشاءاللہ‘‘ کے ساتھ،صرف’’لاقوۃ الا باللہ ‘‘کا اضافہ منقول ہے،اس کےساتھ،’لاحول‘‘ كا اضافہ،نظرِ بد سے بچنے کی دعا کے طور پر منقول نہیں ہے،تاہم احادیثِ مبارکہ میں یہ وارد ہے کہ جب بندہ،’’لاحول ولاقوة الا بالله ‘‘ کہتا ہے،تو اس کو  سلامتی کی دعا دی جاتی ہے۔

نیز ’’لا حول ولا قوۃ إلا باللہ‘‘ کے فضائل کے بھی احادیث میں متعدد فضائل وارد ہوئے ہیں، منجملہ ان میں سے  ایک بڑی فضیلت یہ ہے کہ اس کا بکثرت ورد کرنے سے اللہ تعالیٰ کی نعمتوں کا دوام اور استمرار حاصل ہوگا، بندہ ان سے محروم نہیں ہوگا؛ کیونکہ احادیث میں اسے دنیا وآخرت کی نعمتوں کے بقا ودوام کا سبب قرار دیا گیا ہے۔

چنانچہ حضرت عقبہ بن عامر  رضی اللہ عنہ  نبی کریم  صلی اللہ علیہ وسلم  سے روایت کرتے ہیں:
’’من أنعم اللہ عليہ بنعمۃ، فأراد بقاءہا، فليکثر من قول: لا حول ولا قوۃ إلا باللہ، ثم قرأ رسول اللہ صلی اللہ عليہ وسلم:’’ وَلَوْلَآ إِذْ دَخَلْتَ جَنَّتَکَ قُلْتَ مَا شَاءَ اللہُ لَا قُوَّۃَ إِلَّا بِاللہِ  ۔‘‘

( المعجم الأوسط للطبراني، (۱/۶۵)، باب الألف، من اسمہ أحمد، رقم الحديث: ۱۵۵، الناشر: دار الحرمين- القاہرۃ)

ترجمہ: ’’جس شخص کو اللہ تعالیٰ کوئی نعمت عطا فرمائے اور وہ اس کے باقی رہنے کا خواہشمند ہو تو اس کو چاہیے کہ لا حول ولا قوۃ إلا باللہ   کثرت سے پڑھے، پھر حضور اکرم  صلی اللہ علیہ وسلم  نے یہ آیت تلاوت فرمائی:’’وَلَوْلَا إِذْ دَخَلْتَ جَنَّتَكَ قُلْتَ مَا شَاءَ اللَّهُ لَا قُوَّةَ إِلَّا بِاللَّهِ ‘‘ (الکہف:۳۹) ’’اور جب تم اپنے باغ میں داخل ہوئے تھے تو تم نے ’’ماشاء اللہ لا قوۃ إلا باللہ‘‘ کیوں نہ کہا؟‘‘( یعنی جو اللہ چاہتا ہے، وہی ہوتا ہے، اللہ کی توفیق کے بغیر کسی میں کوئی طاقت نہیں)۔‘‘
خلاصۂ کلام یہ ہے کہ احادیثِ مبارکہ میں ’’لا حول ولا قوۃ إلا باللہ‘‘ پڑھنے کی بہت تاکید آئی ہے، اور اس کے دنیاوی واُخروی بہت سے فوائد وفضائل حضور اکرم  صلی اللہ علیہ وسلم  نے بیان فرمائے ہیں،نیز بعض روایات میں  ''لاحول ولاقوۃ الاباللہ '' کے اخیر میں ''العلی العظیم '' کا اضافہ بھی منقول ہے۔

لہذا،صورتِ مسئولہ میں سائل نے جس طرح     " بسم اللہ الرحمٰن الرحیم ماشاءاللہ لاحول ولاقوۃ الا باللہ العلی العظیم" لکھا ہے، اور اس کا فریم بنوایا ہے یہ درست ہے، تحریف نہیں  ہے،اس کی بنیاد پر سائل کو پریشان کرنا یا کوئی قانونی کاروائی کرنا  شرعاً درست نہیں ہے۔

مرقاۃ المفاتیح میں ہے:

" قال: «كل أمر ذي بال لا يبدأ فيه ببسم الله الرحمن الرحيم فهو أبتر» أي: قليل البركة، أو معدومها، وقيل: إنه من البتر، وهو القطع قبل التمام والكمال، والمراد بذي البال ذو الشأن في الحال، أو المآل."

(مقدمة، ج:1، ص: 3، ط:دار الفكر)

"كنز العمال"میں ہے:

"من رأى شيئا ‌يعجبه فقال: ما شاء الله ‌لا ‌قوة ‌إلا ‌بالله لم تضره العين."

(ص:746،ج:6،‌‌كتاب السحر والعين والكهانة،الفصل الثانی،ط:الرسالة)

"ألجامع الكبير"میں ہے:

"ما أنعم الله تعالى على عبد نعمة من أهل ومال وولد فرآه فأعجبه فقال: إذا رأى ذلك: ما شاء الله ‌لا ‌قوة ‌إلا ‌بالله إلا دفع الله تعالى عنه كل آفة حتى تأتيه منيته."

(ص:513،ج:7،‌‌حرف المیم،ط:القاهرة)

"ألدرالمنثور في التفسير بالمأثور"میں ہے:

"وأخرج سعيد بن منصور وابن أبي حاتم والبيهقي في شعب الإيمان عن عروة أنه كان إذا رأى من ماله شيئا ‌يعجبه أو دخل حائطا من حيطانه قال: ما شاء الله ‌لا ‌قوة ‌إلا ‌بالله ويتأول قول الله: ولولا إذ دخلت جنتك قلت ما شاء الله ‌لا ‌قوة ‌إلا ‌بالله."

(ص:391،ج:5،‌‌سورۃ الکہف،ألآية:38،ط:دار الفكر،بيروت)

"ألمصنف لعبد الرزاق"میں ہے:

"أخبرنا عبد الرزاق، عن معمر، عن قتادة أن عبد الله بن عمرو بن العاص قال: إن الرجل إذا قال: لا إله إلا الله: فهي كلمة الإخلاص التي لا يقبل الله من أحد  عملا حتى يقولها، فإذا قال: الحمد لله، فهي الكلمة التي لم يشكر الله عبد قط حتى يقولها، وإذا قال: الله أكبر، فهي تملأ ما بين السماء والأرض، وإذا قال: سبحان الله، فهي صلاة الخلائق، وإذا قال: ‌لا ‌حول ‌ولا ‌قوة إلا بالله، قال: أسلم واستسلم."

(ص:322،ج:10،‌‌کتاب الجامع،باب ذکر اللہ،ط:التاصیل،بيروت)

"فتح المنعم شرح صحيح مسلم"میں ہے:

"ومن التبريك أن يقول: باسم الله ما شاء الله. ‌لا ‌قوة ‌إلا ‌بالله .وعلى المسلم إذا لاقى عائنا، أو خاف عينا، أو حسدا، أن يحصن نفسه، بقراءة المعوذتين والفاتحة، وبعض الأدعية، ومنها: حصنت نفسي بالحي القيوم الذي لا يموت أبدا، ودفعت عنها السوء بلا حول ولا قوة ‌إلا ‌بالله العلي العظيم، أعوذ بكلمات الله التامات من شر ما خلق وأحاذر."

(ص:546،ج:8،‌‌کتاب الطب والمرض،باب العين والحسد والرقى،ط:دار الشروق)

مؤطا امام مالک میں ہے :

"ولا حول ولا قوة إلا بالله ‌العلي ‌العظيم".

(باب التفسیر،ص:344،ط:المكتبة العلمية)

مصنف عبد الرزاق میں ہے ؛

"وإذا قال: حي على الصلاة قال: «لا حول ولا قوة إلا بالله ‌العلي ‌العظيم»".

(باب القول اذاسمع الاذان،ج:1،ص:478،ط:المكتب الإسلامي)

فقط واللہ اعلم