سوال

وتر کی پہلی تشہد میں  بیٹھنے کی بجائے امام صاحب سیدھے کھڑے ہوگئے، پھر  پیچھے سے مقتدی کا لقمہ آنے سے امام صاحب واپس بیٹھ گئے ، تشہد کے بعد تیسری رکعت پوری کی سلام پھیردیا اور سجدہ سہو نہیں کیا ۔

۱۔ مقتدی کے لقمہ دینے سے امام صاحب کو واپس بیٹھنا چاہیے تھا یا نہیں؟

۲۔ نماز ہوئی یا نہیں اگر نہیں ہوئی تو نماز دوبارہ پڑھنی چاہیے تھی یا نہیں ؟

جواب

اگر امام  قعدہ اولی چھوڑ کر اٹھنے لگا اور مقتدیوں کے لقمہ دینے سے واپس بیٹھ گیا تو اگر امام کے گھٹنے سیدھے نہیں ہوئے تھے یعنی وہ بیٹھنے کے قریب تھا اور پھر لوٹ آیا تو نماز ہوگئی اور سجدہ سہو بھی لازم نہیں ہے، اور اگر اس کے گھٹنے سیدھے ہوگئے تھے یعنی وہ کھڑے ہونے کے قریب تھا تو اس کو کھڑا  ہی رہنا چاہیے تھا ، دوبارہ لوٹ کر نہیں آنا چاہیے تھا، اور اس پر سجدہ سہو بھی واجب ہوگیا  تھا،  تاہم اگر واپس لوٹ آیا تو راجح قول کے مطابق نمازفاسد نہیں ہوگی، اور سجدہ سہو لازم ہونے کی صورت میں اگر سجدہ سہو نہیں کیا تو اس نماز کا وقت کے اندر اعادہ واجب تھا، وقت گزرنے کے بعد اعادہ کا وجوب ختم ہوگیا ہے۔

'' فتاوی شامی'' میں ہے:

''(سها عن القعود الأول من الفرض) ولو عملياً، أما النفل فيعود ما لم يقيد بالسجدة (ثم تذكره عاد إليه) وتشهد، ولا سهو عليه في الأصح  (ما لم يستقم قائماً) في ظاهر المذهب، وهو الأصح فتح (وإلا) أي وإن استقام قائماً (لا) يعود لاشتغاله بفرض القيام (وسجد للسهو) لترك الواجب (فلو عاد إلى القعود) بعد ذلك (تفسد صلاته) لرفض الفرض لما ليس بفرض، وصححه الزيلعي (وقيل: لا) تفسد، لكنه يكون مسيئاً ويسجد لتأخير الواجب (وهو الأشبه)، كما حققه الكمال، وهو الحق، بحر''۔

 (2/ 83،  کتاب الصلوٰۃ ، باب سجود السہو، ط: سعید)

فقط واللہ اعلم