سوال

ایک شخص نے اپنی بیوی کو ایک طلاق دی، "میں تمہیں طلاق دیتا ہوں" ،پھر ایک سال تک رجوع نہیں کیا تو اب رجوع کی کیا صورت ہے؟

جواب

صورتِ مسئولہ میں اگر مذکورہ شخص نے اپنی بیوی کو ایک  مرتبہ یہ کہا تھا کہ : "میں تمہیں طلاق دیتا ہوں" تو اس سے اس کی بیوی پر ایک طلاق واقع ہوگئی تھی، عدت میں رجوع نہ کرنے کی وجہ سے دونوں کا نکاح ختم ہو گیا ، اب اگر دونوں ساتھ رہنا چاہتے ہیں تو اس کے لیے نئے مہر کے ساتھ شرعی گواہوں کی موجودگی میں نیا نکاح کرنا ضروری ہے،نیا نکاح کر نے کے بعد دونوں کا ساتھ رہنا جائز ہو گا اور آئندہ کے لیے شوہر کے پاس دو طلاقوں کا اختیار باقی رہے گا۔

فتاوی شامی میں ہے:

"(و ينكح مبانته بما دون الثلاث في العدة و بعدها بالإجماع) و منع غيره فيها لاشتباه النسب".

(کتاب الطلاق، باب الرجعۃ، 3/ 409، ط:سعید)

فقط واللہ اعلم