سوال

حیض کی حالت میں بیوی کے ساتھ ہم بستری سے نکاح کو کو ئی نقصان پہنچتا ہے یا نہیں؟

جواب

بصورتِ مسئولہ حالتِ حیض میں بیوی سے ہم بستری کرنے سے نکاح پر کوئی اثر نہیں پڑےگا۔

البتہ ملحوظ رہے حالتِ حیض میں بیوی سے جماع کرنا حرام و ناجائز ہے، اگر زوجین کی رضامندی سے اس گناہ کا ارتکاب ہوا ہے تو دونوں گناہ گار ہوئے، دونوں پر استغفار کرنا لازم ہے، اور یہ شرعی نقطہ نظر سے حرام ہونے کے ساتھ ساتھ  طبی لحاظ سے بھی انتہائی نقصان دہ ہے، اس لیے اس سے بالکل اجتناب کرنا ضروری ہے،  نیز مذکورہ گناہ کے ازالے کے لیے بہتر یہ ہے کہ  کچھ صدقہ کرے؛ تاکہ نیکی سے گناہ دھل جائے۔  استطاعت ہو تو ایک دینار ( یعنی4,374 گرام سونا یا اس کی قیمت، اگر ایام کا خون سرخ ہو) یا آدھا دینار (یعنی 2,187 گرام سونا یا اس کی قیمت، جب کہ خون سرخ رنگ کے علاوہ ہو) صدقہ کریں۔  

فتاوی شامی میں ہے:

"ويندب تصدقه بدينار أو نصفه.

(قوله: ويندب إلخ) لما رواه أحمد وأبو داود والترمذي والنسائي عن ابن عباس مرفوعًا «في الذي يأتي امرأته وهي حائض، قال: يتصدق بدينار أو نصف دينار» ثم قيل إن كان الوطء في أول الحيض فبدينار أو آخره فبنصفه، وقيل بدينار لو الدم أسود وبنصفه لو أصفر. قال في البحر: ويدل له ما رواه أبو داود والحاكم وصححه «إذا واقع الرجل أهله وهي حائض، إن كان دما أحمر فليتصدق بدينار، وإن كان أصفر فليتصدق بنصف دينار» .

(كتاب الطهارة، باب الحيض، ج:1، ص:298، ط:ايج ايم سعيد)

فقط والله أعلم