سوال

جانوروں میں کون کون سی چیزیں حرام ہیں؟

جواب

حلال جانور میں سات چیزیں کھانا جائز نہیں ہے، وہ سات چیزیں یہ ہیں:

۱) دمِ مسفوح ، یعنی بہنے والا خون۔

۲) پیشاب کی جگہ (نر و مادہ کی)۔

۳) خصیے (فوطے)۔

۴) پاخانے کی جگہ۔

۵) غدود (سخت گوشت)۔

۶) مثانہ (پیشاب کی تھیلی)۔

۷) پِتّا۔ 

صاحبِ کنز اور علامہ طحطاوی  رحمہما اللہ نے "حرام مغز" کو بھی حرام اجزاء میں شمار کیا ہے، لیکن راجح قول کے مطابق "حرام مغز "  کا کھانا حرام نہیں ہے۔ حرام مغز سے مراد دودھ کی طرح ایک سفید ڈوری ہے جو جانور کی پیٹھ کی ہڈی کے اندر کمر سے لے کر گردن تک ہوتی ہے۔

(المبسوط للسرخسي (11/ 226):

"والنخاع: عرق أبيض في عظم الرقبة".

(طحطاوی علی الدر( 4/360) :

"و زِيْدَ نخاعُ الصلب".

کفایت المفتی میں ہے:

’’کپورے کھانا مکروہ ہے، گردے جائز ہیں، حرام مغز نہ حرام ہے نہ مکروہ، یوں ہی بے چارہ بدنام ہوگیا‘‘۔

فقط واللہ اعلم