سوال

ایک لڑکی کا ایک لڑکے سے نکاح ہوا تھا، لیکن رخصتی سے پہلے لڑکے نے لڑکی سے انکار کر دیا، یعنی اسے پسند نہیں کیا، جس پر لڑکے اور لڑکی والوں کے درمیان تنازعہ پیدا ہو گیا۔ مسئلے کے حل کے لیے دو جرگہ دار مقرر کیے گئے: ایک لڑکے والوں کی طرف سے اور ایک لڑکی والوں کی طرف سے۔فریقین نے حلفاً، طلاقِ ثلاثہ کے ساتھ، حتمی اور غیر مشروط اختیار متعلقہ جرگہ داروں کو دے دیا۔

دونوں جرگہ داروں نے باہمی اتفاق سے فیصلہ تحریر کر لیا اور مل کر یہ فیصلہ لڑکے والوں کو سنا دیا کہ انہیں بطور جرمانہ ساڑھے سات لاکھ روپے ادا کرنا ہوں گے، جن میں تین لاکھ روپے مہر کے تھے اور ساڑھے چار لاکھ روپے اضافی لازم کیے گئے تھے۔ اس طرح کل رقم ساڑھے سات لاکھ روپے بنتی ہے، جس پر لڑکے والے آمادہ ہو گئے اور ادائیگی کے لیے تیار ہیں۔

تاہم ابھی تک یہ فیصلہ لڑکی والوں کو نہیں سنایا گیا تھا کہ لڑکی والوں کی طرف سے مقرر جرگہ دار نے اپنے فیصلے سے واک آؤٹ کر لیا، غالباً اس وجہ سے کہ اس کے نزدیک جرمانہ کم مقرر کیا گیا تھا۔ چنانچہ اس وقت لڑکے والے تو ادائیگی کے لیے تیار ہیں، لیکن لڑکی والے اس رقم کو قبول نہیں کر رہے۔

سوال یہ ہے کہ جس جرگہ دار نے فیصلے سے واک آؤٹ کیا ہے، اس کی وجہ سے اس کی بیوی پر تین طلاق واقع ہوئیں یا نہیں؟ کیونکہ وہ جرگہ دار خود لڑکی والے فریق کا حصہ تھا، یعنی اس نے بھی تین طلاق کا حلف اٹھایا تھا۔

جواب

صورتِ مسئولہ میں لڑکے کے لڑکی کو چھوڑنے پر جو جرمانہ مقرر کیا گیا ہے، یہ فیصلہ غیر شرعی ہے، لہٰذا لڑکے والوں پر اس رقم کی ادائیگی لازم نہیں ہے۔ اگر لڑکے نے لڑکی کو رخصتی اور خلوتِ صحیحہ سے پہلے طلاق دی ہے، تو لڑکے کے ذمہ مقررہ مہر میں سے  صرف آدھے مہر کی ادائیگی لازم ہوگی۔

باقی جس جرگہ دار نے فیصلے سے واک آؤٹ کیا ہے، ان کی بیویوں پر طلاق واقع نہیں ہوئی، کیوں کہ وہ اختیار دینے میں شامل نہیں ہے۔