سوال

ہاؤس بلڈنگ الاؤنس ، بغیر سود گورنمنٹ ملازمین کو ایک قرض کی سہولت ہے،  آٹھ لاکھ  ہاؤس بلڈنگ الاؤنس پر  سال گزرنے پر  زکات ہے کہ نہیں ؟ کیوں کہ یہ ایک طویل المیعاد قرض ہے اور سنا ہے قرض پر  زکات نہیں۔ اور اگر  زکات لاگو ہوتی ہے تو اس کا طریقہ کار کیا ہے؟

جواب

اگر کوئی شخص طویل المیعاد قرض لے (مثلاً: قرض کی مذکورہ صورت جس کی ادائیگی دس سال میں کرنی ہوتی ہے)تو اس کے لیے یہ حکم ہے کہ ہر سال دیگر قابلِ زکاۃ اموال کی زکاۃ  کی ادائیگی کے وقت اس سال  واجب الادا قرضہ (یعنی مکمل قرضہ میں سے جتنی مقدار ادا کرنا اسی سال ذمہ پر ہو اس) کے بقدر  منہا کر کے باقی کی زکاۃ ادا کی جائے گی بشرطیکہ باقی مال  نامی (سونا چاندی، نقدی، مالِ تجارت) نصاب (ساڑھے باون تولہ چاندی کی مالیت) تک پہنچ رہا ہو۔

نوٹ: اگر حکومت کی طرف سے ہاؤس بلڈنگ فنانس کا قرضہ سود پر دیا جاتا ہو یعنی جتنا قرضہ دیا ہو قسطوں کی صورت میں حکومت اس سے کچھ زیادہ وصول کرتی ہو تو اس طرح کا سودی قرضہ لینا جائز نہیں ہے، کیوں کہ سودی قرضہ کا لین دین بنصِ قرآنی ناجائز اور حرام ہے۔

الدر المختار وحاشية ابن عابدين (رد المحتار) (5/ 166):

''وفي الأشباه: كل قرض جر نفعاً حرام.

(قوله: كل قرض جر نفعاً حرام) أي إذا كان مشروطاً."

الدر المختار وحاشية ابن عابدين (رد المحتار) (2/ 259)

"(وسببه) أي سبب افتراضها (ملك نصاب حولي) نسبة للحول؛ لحولانه عليه (تام) ... (فارغ عن دين له مطالب من جهة العباد)."

 فقط واللہ اعلم