سوال

کیا گھوڑا کھانا جائز ہے؟

جواب

 واضح رہے کہ گھوڑا فی نفسہ حلال جانور  ہے، لیکن امام ابوحنیفہ رحمہ اللہ کے نزدیک گھوڑے کے آلۂ   جہاد  ہونے کی وجہ سے  گھوڑے کا گوشت کھانا مکروہِ تحریمی  ہے،  اور فقہ حنفی میں اسی قول پر فتوی ہے، آج کے دور میں بھی جنگ کے دوران اور سرحدات کی حفاظت کے لیے دشوار گزار راستوں سے ہوتے ہوئے مختلف اہم پوسٹوں تک پہنچنے میں گھوڑوں کا استعمال کیا جاتا ہے، اسی وجہ سے ہر ملک کی قومی پریڈ میں فوج/ پولیس کے گھڑ سوار دستے بھی پیش ہوتے ہیں، اور حدیثِ پاک میں ہے کہ گھوڑوں کی پیشانی میں قیامت تک کے لیے خیر لکھ دی گئی ہے، اس لیے یہ اشکال بھی لازم نہیں آتا کہ گھوڑے اب آلہ جہاد نہیں رہے؛ لہذا گھوڑے کے گوشت کا حکم موجودہ زمانے میں بھی یہی ہے کہ گھوڑے کا گوشت حلال ہونے کے باوجود کھانا مکروہِ تحریمی ہے۔

فتاوی ہندیہ میں ہے :

"يكره لحم الخيل في قول أبي حنيفة رحمه الله تعالى، خلافاً لصاحبيه، واختلف المشايخ في تفسير الكراهة، والصحيح أنه أراد بها التحريم، ولبنه كلحمه، كذا في فتاوى قاضي خان. وقال الشيخ الإمام السرخسي: ما قاله أبو حنيفة رحمه الله تعالى أحوط، وما قالا أوسع، كذا في السراجية".

(کتاب الذبائح ،الباب الثالث فی المتفرقات،ج:5،ص:290،دارالفکر)

فقط واللہ اعلم