سوال

اگر نیند میں احتلام  ہونے کے وقت آنکھیں کھل جائے، اور پھر پورا دن شہوت والے خیات غالب ہو تو کیا کیا جائے۔

جواب

صورتِ مسئولہ میں نفس کو قابو رکھنے کے لئے  اس کے  اسباب مثلاً  غلط خیالات ،بری صحبت  ،تنہائی میں رہنے اور بدنظری وغیرہ سے مکمل اجتناب کرنا چاہیے، نیز  کسی اللہ والے کی صحبت اختیار کیجیے،  اور والدین سے شادی کروانے کا بھی کہیں، اگر والدین  کو خود کہنا ممکن نہ ہو تو کسی کے ذریعہ سے شادی کا کہہ دیں ،جب  تک شادی نہ ہو  کثرت سے  روزے رکھنے کا اہتمام کریں ، کثرت سے درجِ ذیل دعا  کا ورد کیا جائے:

"اَللّٰهُمَّ إِنِّيْ أَسْأَلُكَ الْهُدٰى وَالتُّقٰى وَالْعَفَافَ وَالْغِنٰی"

اورساتھ ساتھ   سید الاستغفار پڑھتے رہیں، اور سید الاستغفار درجِ ذیل ہے: 

"اللَّهُمَّ أنْتَ ربِّى لَا إِلَهَ إِلَّا أَنْتَ، خلَقْتَنِى وَأنَا عَبْدُكَ، وَأنَا عَلَى عَهْدِك وَوَعْدِكَ مَا اسْتَطَعْتُ، أعُوذُ بكَ مِنْ شَرِّ مَا صَنَعْتُ وَأبُوءُ لَكَ بنِعْمَتِكَ عَلىَّ، وَأعْتَرِفُ بدنُوبِى فَاغْفِرْ لى ذُنُوبى، إنَّهُ لايَغفرُ الذنوب إِلَّا أنْتَ."

ترجمہ:" اے اللہ تو ہی میرا رب ہے ، تیرے علاوہ کوئی عبادت کے لائق نہیں،تو نے مجھے پیدا کیا اور میں تیرا بندہ ہوں اور تیرے عہد اور وعدے پر قائم ہوں جس قدرطاقت رکھتا ہوں،میں نے جو کچھ کیا اس کے شر سے تیری پناہ چاہتا ہوں،اپنے آپ پر تیری نعمت کا اقرار کرتا ہوں اور اپنے گناہوں کا اعتراف کرتا ہوں،پس مجھے بخش دے کیوں کہ تیرے علاوہ کوئی گناہوں کو نہیں بخش سکتا۔ "

(ماخوذ ازجمع الجوامع، الہمزۃ مع الواو، ج:3، ص:294، ط:جمہوریہ مصر)

اور ہر نماز کے بعد سینے پر ہاتھ رکھ کر  سات  مرتبہ  "یاقَوِيُّ الْقَادِرُ الْمُقْتَدِرُ قَوِّنِيْ وَقَلْبِيْ"پڑھ کر اپنے آپ پر دم کرے، ان شاء اللہ تعالیٰ اس قبیح فعل سے نجات مل جائےگی۔

فقط اللہ اعلم