سوال

گائے  کا کچا گوشت تقسیم کرنا کیسا ہے ؟

جواب

گائے ذبح  کرکے  اس کا کچا گوشت تقسیم کرنا بھی درست اور باعث ثواب ہے ،جانور کو ذبح کرکے لوگوں پر صدقہ کرنے کے بارے حدیث شریف میں آتا ہے: 

"عن أبي قلابة، عن أبي المليح، قال: قال نبيشة: نادى رجل رسول الله صلى الله عليه وسلم إنا كنا نعتر عتيرةً في الجاهلية في رجب فما تأمرنا؟ قال: اذبحوا لله في أي شهر كان، وبروا الله عز وجل، وأطعموا".

(سنن أبي داود ،ص:۳۹۱، کتاب الصحایا، باب في العتیرة) 

ترجمہ:  ایک آدمی نے رسول اللہ ﷺ کو آواز لگائی  کہ ہم جاہلیت میں رجب میں قربانی کرتے تھے، اب آپ کا کیا حکم ہے؟ آپ نے فرمایا: کسی بھی مہینے میں اللہ کے نام پر جانور ذبح کرو، اللہ تعالی کی اطاعت کرو اور لوگوں کو کھلاؤ۔(ابوداؤد شریف:۱؍۳۹۱)

اگر جانور کو اللہ کے نام پر ذبح کر کے اس کا گوشت غریبوں کو دے دے ،  تب بھی مقصد حاصل ہوجاتا ہے،  مگر غریب کی ضرورت کو مدنظر رکھتے ہوئے صدقہ کرنا زیادہ بہتر ہے، اگر اسے کھانے  یا راشن کی ضرورت ہو تو کھانا دینا، اگر لباس کی ضرورت ہو تو لباس مہیا کرنا پانی کی ضرورت ہو تو کنواں کھدوانا زیادہ فضیلت کا باعث ہوگا۔  اور عمومی احوال میں رقم صدقہ کرنے میں زیادہ فضیلت ہے؛ کیوں کہ اس صورت میں مال سے فقیر کی ہرقسم کی حاجت پوری ہوتی ہے۔ فقط واللہ اعلم