سوال

ہم نے کچھ دنوں پہلے   پودوں کی زکوۃ کے متعلق  سوال کیا تھا،  جب کہ جواب عشر سے متعلق دیا گیا ہے،  دونوں میں کچھ تطبیق نہیں ہے ، وضاحت کے ساتھ جواب مرحمت فرمائیں. سوال وجواب پیش خدمت ہے۔

"سوال:ایک شخص نے دو لاکھ روپے کے لپٹس کے پودے اس نیت سے لگائے کہ پانچ سال کے بعد جب تیار ہوجائیں گے تو ہم انہیں کٹوا کر فروخت کریں گے تو سوال یہ ہے کہ ان درختوں کی زکوۃ کیسے ادا کریں؟ پانچوں سال کی ادا کریں گے یا صرف پانچویں سال کی؟

جواب:  زمین کی اس پیداوار میں عشر واجب ہوتا ہے جس سے آمدنی حاصل کرنا یا پیداوار سے فائدہ اٹھانا مقصود ہے، اور اسی نیت سے اس کو لگایا جائے، اور جو اشیاء خود ہی بغیر قصد کے تبعاً حاصل ہوجائیں ان میں عشر لازم نہیں ہوتا۔ لہٰذا زرعی زمین میں خود رو درخت جو بغیر قصد کے تبعاً حاصل ہوئے ہیں ان میں عشر لازم نہیں ہوگا۔ تاہم اگر ان درختوں کو بیچ کر نفع کمایا اور دیگر قابلِ زکاۃ اموال کے ساتھ مل کر وہ رقم زکاۃ کے نصاب کے بقدر پہنچ گئی تو زکاۃ کی شرائط کے مطابق سال پورا ہونے پر مذکورہ رقم پر زکاۃ واجب ہوگی۔ البتہ اگر کسی علاقے میں درختوں کی آبیاری اور نگہداشت اسی مقصد سے ہوتی ہوکہ ان کو کاٹ کر فروخت کیا جائے گا اور ان کی دیکھ بھال کی جاتی ہو ، ان سے کمائی مقصود ہوتی ہو تو ایسی صورت میں ان درختوں میں بھی عشر واجب ہوگا۔لہذا صورتِ مسئولہ میں مذکورہ درختوں میں عشر لازم ہوگا۔

'بدائع الصنائع ' میں ہے: "ومنها: أن يكون الخارج من الأرض مما يقصد بزراعته نماء الأرض وتستغل الأرض به عادةً، فلا عشر في الحطب والحشيش والقصب الفارسي؛ لأن هذه الأشياء لاتستنمى بها الأرض ولاتستغل بها عادة؛ لأن الأرض لاتنمو بها، بل تفسد، فلم تكن نماء الأرض، حتى قالوا في الأرض: إذا اتخذها مقصبةً وفي شجره الخلاف، التي تقطع في كل ثلاث سنين، أو أربع سنين أنه يجب فيها العشر؛ لأن ذلك غلة وافرة." (2 / 58، فصل الشرائط المحلیۃ، ط: سعید)."

جواب

واضح رہے کہ جن  درختوں یا پودوں  کی آبیاری اور نگہداشت اسی مقصد سے ہوتی ہوکہ ان کو  کاٹ  کر فروخت کیا جائے گا ، ان سے کمائی مقصود ہوتی ہو تو ایسی صورت میں ان  درختوں میں بھی عشر واجب  ہوتا ہے، اور  آپ کا سوال بھی اسی قسم کے پودوں کے متعلق تھا ،  اس لیے جواب  اصولی طور پر عشر کے متعلق   دیا گیا،  لہذا سوال اور جواب میں مطابقت موجود ہے۔

  ' تنقیح الفتاوی الحامدیہ'میں ہے:

"(سئل) في رجل له أشجار مثمرة في أرض عشرية فقطعها ويريد العشري أخذ عشرها فهل له ذلك؟ (الجواب) : لا عشر في نفس الأشجار المثمرة، كما في الزيلعي والبحر وغيرهما۔ (أقول:) وإنما العشر في نفس الثمر، وفي الأشجار المعدة للقطع، كما مر".

(سئل) في أوراق التوت هل يجب فيها العشر أم لا؟ (الجواب) : قال في صور المسائل نقلاً عن الزاهدي ما صورته: قلت: يمكن أن يلحق به أغصان التوت عندنا وأوراقها ؛ لأنه يقصد بها الاستغلال بخوارزم وخراسان، وقد نص عليه في درر الفقه، فقال: يجب العشر في أوراق التوت وأغصان الخلاف التي تقطع في أوان تقليم الكروم وغير ذلك".

(باب الزکوٰۃ والعشر، ج:1، ص:12،  ط: دارالمعرفۃ)

فقط والله أعلم