سوال

فجر کی نماز کے بعد قرآن پاک کی تلاوت کے دوران سجدہ تلاوت پر پہنچ کر سجدہ تلاوت کرنا ہے لیکن وہ وقت سجدے کیلئے مکروہ ہے یعنی وقت نماز فجر کیلئے قضا ھوچکا اور سورج بھی طلوع ھونے میں 10منٹ باقی ہیں تو کیا ایسے وقت تلاوت قرآن روک دینی چاہیئے یا تلاوت جاری رکھوں اور سجدہ تلاوت بعد میں ادا کروں؟ رھنمائی فرمائیں ۔۔۔جزاک اللہ

جواب

نماز فجر کے بعد طلوعِ آفتاب سے پہلے تک اور عصر کے بعد سورج کے زرد ہونے تک  سجدہ تلاوت کی ادائیگی درست ہے۔البتہ عین طلوع اور عین غروب کے اوقات میں سجدہ تلاوت جائز نہیں، الا یہ کہ اسی وقت آیتِ سجدہ کی تلاوت کی تو اس سجدہ تلاوت کی ادائیگی کی اجازت ہوگی۔

لہذا صورت مسؤلہ میں بھی تلاوت جاری رکھیں اور جب آیت سجدہ آجائے تو اسی وقت سجدہ تلاوت کرنا درست ہے۔''فتاوی ہندیہ'' میں ہے:

''( الفصل الثالث في بيان الأوقات التي لا تجوز فيها الصلاة وتكره فيها ) ثلاث ساعات لا تجوز فيها المكتوبة ولا صلاة الجنازة ولا سجدة التلاوة: إذا طلعت الشمس حتى ترتفع وعند الانتصاف إلى أن تزول وعند احمرارها إلى أن يغيب إلا عصر يومه ذلك فإنه يجوز أداؤه عند الغروب''۔(2/257)

فقط و الله أعلم