سوال

ایک ویب سائٹ ہے جو مختلف چیزوں کی تصاویر اپلوڈ کرتی ہے اور اگر اس کو کسی چیز کا آرڈر دیا جائے، تو وہ مطلوبہ جگہ تک اس کو پہنچادیتی ہے، اب اگر میرے پاس ایمازون کے ذریعہ کسی چیز کا آرڈر آئے اور میں اس شخص کا ایڈرس پہلی والی ویب سائٹ پر ڈال دیتا ہوں، کیوں کہ تصویر میں نے اسی ویب سے ایمازون پر لگائی تھی، وہ چیز میری ملکیت میں نہیں ہوتی اور کسٹمر کو یہ معلوم نہیں ہوتا کہ یہ میرے پاس نہیں ہے، وہ سمجھتا ہے کہ میں نے ہی بھیجی ہے، لہٰذا سوال یہ ہے کہ میرا اس طرح نفع کمانا اور کاروبار کارنا جائز ہے؟

جواب

واضح رہے کہ کسی آن لائن شاپنگ ویب سائٹ یا کسی بھی آن لائن ایپ اور پلیٹ فارم سے   آن لائن کاروبار کرنے کی صورت میں جو چیز فروخت کی جارہی ہو  اگر وہ فروخت کرنے والے کی ملکیت میں موجود ہو اور تصویر دکھلا کر سودا کیا جا رہا ہو تو ایسی صورت میں بھی آن لائن خرید و فروخت شرعاً درست ہوگی، لیکن اگر مال فروخت کرنے والے کی ملکیت میں نہیں ہے اور وہ محض اشتہار، تصویر دکھلاکر کسی کو وہ سامان فروخت کرتا ہو (یعنی سودا کرتے وقت یوں کہے کہ: ’’فلاں چیز میں نے آپ کو اتنے میں بیچی‘‘، وغیرہ) اور بعد میں وہ سامان کسی اور دکان،اسٹوروغیرہ سے خرید کردیتا ہو تو یہ صورت فروخت کنندہ  کی ملکیت یا قبضہ میں وہ چیز  موجود نہ ہونے کی وجہ سے جائز نہیں ہے؛ اس لیے کہ جو چیز فروخت کرنا مقصود ہو وہ فروخت کنندہ کی ملکیت یا وکیل (ایجنٹ)کے قبضے میں ہونا شرعاً ضروری ہوتا ہے۔

اس کے جواز کی صورتیں درج ذیل ہیں:
:- فروخت کنندہ  مال قبضہ میں آنے سے پہلے فروختگی  نہ کرے، بلکہ فروختگی کا وعدہ کرے،فروختگی کا معاملہ مال پہنچنے کے بعد کرے اور فروخت کنندہ اور خریدار  سے یہ کہہ دے کہ یہ چیز اگر آپ مجھ سے خریدیں گے تو میں آپ کو اتنے کی قیمت میں  فروخت کردوں گا۔ پھر جب وہ آرڈر دے، تو وہ مال خرید کر اسے فروخت کردے۔

 :-آن لائن کام کرنے والا فرد یا کمپنی ایک فرد (خریدار) سے آرڈر لے اورمطلوبہ چیز کسی دوسرے فرد یا کمپنی سے لے کر خریدار تک پہنچائے اور اس عمل کی اُجرت مقرر کرکے لے تو یہ بھی جائز ہے، یعنی اشیاء کی خرید وفروخت کے بجائے بروکری كرے اور اس کی اُجرت مقرر کرکے یہ معاملہ کرے۔ 

البتہ جواز کی ہر صورت میں خریدار کو مطلوبہ چیز ملنے کے بعد ”خیارِ رؤیت“ حاصل ہوگا، یعنی جب ’’مال‘‘ خریدار کو مل جائے تو دیکھنے کے بعد اس کی مطلوبہ شرائط کے مطابق نہ ہونے کی صورت میں اُسےواپس کرنے کااختیار حاصل ہوگا۔

چوں کہ  آن لائن خرید وفروخت کرتے ہوئے ’’مال‘‘ کی تصویر دکھانا بعینہ نمونہ دکھانے کی طرح نہیں ہے، کیوں کہ تصویر کسی شئے کی مثل تو ہے، عین نہیں ہے ، لہٰذا حقیقتاً مال  دیکھ لینے کے بعد خریدار کو خیارِ رؤیت حاصل ہوگا۔

حدیث شریف میں ہے:

’’عن ابن عباسؓ، أن رسول اللہ صلی اللہ عليہ وسلم قال: ’’من ابتاع طعاما فلا يبعه حتی يستوفيه‘‘، قال ابن عباسؓ: وأحسب کل شيء مثله.‘‘

 (الصحيح لمسلم، باب بطلان بیع المبیع قبل القبض رقم الحديث:1525)

’’حضرت عبد اللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا کہ: جب کوئی کھانے کی چیز خریدے تو اس وقت تک نہ بیچے جب تک اس پر مکمل قبضہ نہ کرلے، حضرت ابن عباس رضی اللہ عنہما فرماتے ہیں کہ: میں سمجھتا ہوں کہ ہر چیز کا یہی حکم ہے۔‘‘

’’فتح القدیر‘‘ میں ہے:

"ومن اشتری شيئا مما ينقل ويحول لم يجز له بيعه حتی يقبضه، لأنه عليه الصلاۃ والسلام نهی عن بيع ما لم يقبض ؛ولأن فيه غرر انفساخ العقد علی اعتبار الهلاك... ثم علل الحديث (لأن فيه غرر انفساخ العقد) الأول (علی اعتبار هلاك المبيع) قبل القبض فيتبين حينئذٍ أنہ باع ملک الغير بغير إذنه وذٰلك مفسد للعقد، وفي الصحاح أنه صلی اللہ عليه وسلم نهی عن بيع الغرر."

(کتاب البیوع:ج:ص:510، 5126، ط: دار الفکر)

فقط واللہ اعلم