سوال

جانور اگر پکے دانت کے بعد ایک دانت اور  نکالے تو اس کی قربانی کر سکتے ہیں؟

جواب

شریعتِ مطہرہ میں قربانی کے جانور کی قربانی درست ہونے کے لیے ان کے لیے ایک خاص عمر کی تعیین ہے، یعنی بکرا ، بکری ،دنبہ، بھیڑ وغیرہ کی ایک سال، گائے ، بھینس وغیرہ کی دو سال، اور اونٹ ، اونٹنی کی عمر پانچ سال پورا ہونا ضروری ہے،  البتہ دنبہ اور بھیڑ وغیرہ اگر چھ ماہ  کا ہوجائے، لیکن وہ صحت اور فربہ ہونے میں سال بھر کا معلوم ہوتا ہو تو اس کی قربانی بھی درست ہوگی۔  اگر یقینی طور پر معلوم ہو کہ ان جانوروں کی اتنی عمریں ہوگئیں ہیں (مثلاً: جانور کو اپنے سامنے پلتا بڑھتادیکھا ہو اور ان کی عمر بھی معلوم ہو) تو ان کی قربانی درست ہے، پکے دانت نکلنا ضروری نہیں، بلکہ مدت پوری ہونا شرط ہے۔ 

تاہم آج کل چوں کہ فساد کا غلبہ ہے؛ اس لیے صرف بیوپاروی کی بات پر اعتماد نہیں کیا جاسکتا، اس لیے  احتیاطاً دانت کو عمر معلوم کرنے کے لیے علامت کے طور پر مقرر کیا گیا ہے، دانتوں کی علامت ایسی ہے کہ اس میں کم عمر کا جانور نہیں آسکتا ، ہاں زیادہ عمر کا آںا  ممکن ہے، یعنی تجربے سے یہ بات ثابت ہے کہ مطلوبہ عمر سے پہلے جانور کے دو دانت نہیں نکلتے، لیکن دو دانت سے زیادہ اگر مزید بھی دانت  نکلیں تو اس جانور کی قربانی درست ہے،

حاصل یہ ہے کہ  دانت اگر دو سے کم ہوں تو اس میں تفصیل ہے لیکن اگر دو سے زیادہ ہو تو  چوں کہ  وہ جانور قربانی کی عمر کو پہنچ چکا ہے، اس لیے اس کی قربانی جائز ہوگی۔

لہذا صورت مسئولہ میں اگر جانور کے کچے دانت گرنے کے بعد دو پکے دانت آنے کے بعد مزید ایک اور دانت بھی آگیا ہے تو ایسے جانور کی قربانی جائز ہے۔

الفتاوى الهندية (5/ 297):
"(وأما سنه) فلايجوز شيء مما ذكرنا من الإبل والبقر والغنم عن الأضحية إلا الثني من كل جنس وإلا الجذع من الضأن خاصةً إذا كان عظيماً، وأما معاني هذه الأسماء فقد ذكر القدوري: أن الفقهاء قالوا: الجذع من الغنم ابن ستة أشهر، والثني ابن سنة۔ والجذع من البقر ابن سنة، والثني منه ابن سنتين. والجذع من الإبل ابن أربع سنين، والثني ابن خمس. وتقدير هذه الأسنان بما قلنا يمنع النقصان، ولايمنع الزيادة، حتى لو ضحى بأقل من ذلك شيئاً لايجوز، ولو ضحى بأكثر من ذلك شيئاً يجوز ويكون أفضل".  

(کفایت المفتی ، 8/217، ط: دار الاشاعت) فقط واللہ اعلم