سوال

ڈاکٹر ذاکر نائیک کے بیانات سننا کیسا ہے کچھ لوگ کہتے ہیں کہ اس کا عقیدہ درست نہیں ہے ؟ براہ کرم رہنمائی فرمائیں۔

جواب

واضح رہے کہ مسلکی اعتبار سے ڈاکٹر ذاکر نائیک غیر مقلد  غیر عالم شخص ہیں، ایم بی بی ایس (طب) ڈاکٹر ہیں،   انہیں اَدیان ومذاہب کے بارے میں کافی معلومات ہیں اور تقابلِ اَدیان  پر مہارت بھی ہے،لہٰذا خاص طور پر اس موضوع کے حوالے سے ان کے بیانات سن سکتے ہیں،لیکن حدیث اور فقہ میں ان کی علمیت اس درجے کی نہیں، اور ضروری بھی نہیں کہ ہر شخص ہر علم میں کامل مہارت رکھتا ہو ، اس لیے دینی مسائل کے بارے میں ان کی آراء  کی کسی مستند عالمِ دین سے تحقیق کی جائے اور اس کے  بعد عمل کیا جائےاسی طرح   موصوف بہت  سارے  مسائل میں اہلِ  سنت والجماعت سے ہٹے ہوئے ہیں؛ لہٰذا عام آدمی کے لیے ذاکر نائیک کے  بیان کردہ مسائل سننا اور ان پر اعتماد کرنا جائز نہیں ہے۔

(تفصیل کے  لیے دیکھیے:  چند اہم عصری مسائل : ڈاکٹر ذاکر نائیک  اپنی تقریروں اور تحریروں میں (ص: 93 تا 112)۔ ناشر: مکتبہ دارالعلوم دیوبند)

فقط واللہ اعلم