سوال

14 سال کا بچہ تراویح کی امامت کروا سکتا ہےکہ نہیں؟ تراویح کی امامت کے لیے کم ازکم کتنی عمر ہونی چاہیے؟

جواب

جس طرح فرض نمازوں میں بالغ مقتدیوں کی امامت کے لیے امام کا بالغ ہونا ضروری ہے، ایسے ہی تراویح میں امامت کے لیےبھی امام کا بالغ ہونا ضروری ہے، اور بالغ ہو نے کا مدار بلوغت کی علامات پر ہے، اگر علامات  ظاہر ہوجائیں تو  وہ امامت کرسکتاہے، علامات ظاہر نہ ہوں تو  قمری اعتبار سے پندرہ سال سے کم عمر کا لڑکا امامت نہیں کراسکتا،  فقہاءِ کرام نے لکھا ہے کہ لڑکے میں کم سے کم بارہ سال کی عمر میں بلوغت کی علامات معتبر ہیں، اس سے پہلے نہیں، لہٰذا چودہ سال کے بچے میں بلوغت کی علامات ظاہر ہوں تو وہ بالغ مقتدیوں کی امامت کرسکے گا، ورنہ نہیں۔

ہاں نابالغ بچہ تراویح پڑھائے اور اس کے پیچھے نابالغ بچے ہی تراویح ادا کریں تو درست ہے۔ فقط واللہ اعلم