چرس کا کاروبار کرنا شرعی لحاظ سے کیسا ہے؟
چرس ایک نشہ آور مادہ ہے ، اور نشہ کرنا اسلام میں حرام ہے تو چرس پینا بھی حرام ہے۔
"عن أبي حازم عن عبد الله بن عمر قال قال رسول الله صلى الله عليه وسلمكل مسكر حرام وما أسكر كثيره فقليله حرام". (السنن الکبری)
البتہ ادویہ میں اس کا استعمال ہونے کی وجہ سے کاشت جائز ہے۔ اور کسی دوائی بنانے والے کو یہ بیچنا جائز ہے، لیکن ایسا شخص جس کے بارے میں یقین ہو کہ یہ اس کو غلط مقصد میں استعمال کرے گا، اسے یہ فروخت کرنا جائز نہیں ہے۔
مفتی اعظم ہندمفتی کفایت اللہ رحمہ اللہ ایک سوال کے جواب میں لکھتے ہیں:
’’افیون، چرس، بھنگ یہ تمام چیزیں پاک ہیں اوران کادوا میں خارجی استعمال جائزہے، نشہ کی غرض سے ان کو استعمال کرنا ناجائزہے۔ مگران سب کی تجارت بوجہ فی الجملہ مباح الاستعمال ہونے کے مباح ہے، تجارت تو شراب اور خنزیر کی حرام ہے کہ ان کااستعمال خارجی بھی ناجائزہے۔‘‘
(کفایت المفتی 9/129،ط:دارالاشاعت)
فقط واللہ اعلم
فتوی نمبر : 144112200996
دارالافتاء : جامعہ علوم اسلامیہ علامہ محمد یوسف بنوری ٹاؤن