سوال

رمضان اور عید کے موقع پر ہمارے یہاں تین اعلانات ہوتے ہیں  1: مرکزی رؤیت ہلال کمیٹی کا اعلان، 2: صوبائی حکومت کا اعلان ، 3: مسجد ۔۔۔ کمیٹی کا اعلان ،اب بسا اوقات ایسا ہوتا ہے کہ مرکزی رؤیت ہلال کمیٹی چاند کے نظر نہ آنے کا اعلان کر دیتی ہے، اور صوبائی حکومت اور مسجد ۔۔۔کمیٹی چاند نظر آنے کا اعلان کر دیتی ہے، اور کبھی مرکزی رؤیت ہلال کمیٹی اور صوبائی حکومت متفقہ ہوتے ہیں اور مسجد۔۔۔ ان سے اختلاف کر لیتی ہے،اس سے علاقہ میں کافی انتشار پیدا ہوتا ہے، اب کچھ درد دل والے حضرات نے اپنے علاقے کی حد تک عوام کو متفق کرنے اور ایک ہی دن عید اور رمضان کےلیے سعی شروع کی ہے، آپ حضرات سے رہ  نمائی کی گزارش ہے کہ درج بالا تین اعلانات میں سے کس کو اپنے لیے معیار بنائیں ؟

جواب

 واضح رہے کہ کسی علاقے میں کوئی قاضی یا حکومت کی طرف سے مقرر کردہ  کمیٹی پورے  ضلع یا صوبے  یا پورے ملک  کے لیے ہو  اور وہ شرعی شہادت  موصول ہونے پر  چاند نظر آنے کا اعلان کردے تو اس کے فیصلے پر اپنی حدود اور ولایت میں  ان لوگوں پرجن تک فیصلہ اور اعلان یقینی اور معتبر ذریعے سے پہنچ جائے  عمل  کرنا واجب ہوگا،  چوں کہ  مرکزی رؤیت ہلال کمیٹی  قاضی شرعی کی  حیثیت    رکھتی ہے، لہذا شہادت موصول ہونے پر اگر وہ اعلان کردے تو ملک میں  جن لوگوں تک یہ اعلان معتبر ذرائع سے پہنچ جائے ، ان پر روزہ رکھنا یا عید منانا   لازم ہوگا۔   

 مرکزی رؤیت ہلال کمیٹی کے علاوہ غیر مجاز ، پرائیویٹ کمیٹیاں رؤیت ہلال کا فیصلہ کرنے میں خود مختار نہیں ہیں، اور ان کا فیصلہ دوسرے لوگوں کے لیے قابلِ عمل نہیں ہے، اس لیےکہ ان کو ولایتِ عامہ حاصل نہیں ہے، اور ان کا اعلان عام لوگوں کے لیے حجت نہیں ہے۔

لہذا صورت ِمسئولہ میں مرکزی رؤیت   ہلال کمیٹی کے  اعلان کے مطابق عمل کرنا ضروری ہے ،آپ کے علاقہ کی کسی پرائیویٹ    کمیٹی کا فیصلہ معتبر نہیں ہے، ہاں اگر کوئی شخص خود اپنی آنکھوں سے چاند دیکھ لے تو اس پر روزہ رکھنا لازم ہو گا، چاہے حکومت کی طرف سے اعلان ہو یا نہ ہو،  البتہ  عید  منانے  میں  وہ  مرکزی  کمیٹی  کے  اعلان  کے  تابع    ہوگا۔

نیل الاوطا ر میں ہے:

"وثانيها: أنه لا يلزم أهل بلد رؤية غيرهم إلا أن يثبت ذلك عند الإمام الأعظم فيلزم كلهم لأن البلاد في حقه كالبلد الواحد إذ حكمه نافذ في الجميع، قاله ابن الماجشون."

(کتاب الصیام , باب الهلال إذا رآه أهل بلدة هل يلزم بقية البلاد الصوم جلد 4 ص: 230 ط: دارالحدیث , مصر)

فتاوی تاتارخانیہ میں ہے:

"الفتاوی النسفیة: سئل عن قضاء القاضي برؤیة هلال شهر رمضان بشهادة شاهدین عند الاشتباه في مصر، هل یجوز لأهل مصر آخر العمل بحکمهم؟ فقال:لا، ولایکون مصرآخر تبعاً لهذا المصر، إنما سکان هذا المصر وقراها یکون تبعاً له."

(کتاب الصوم، الفصل الثاني فیما یتعلق برؤیة الهلال، جلد: 2، ص: 356 ط: ادارۃ القرآن)

مولانا مفتی محمود رحمہ اللہ "زبدۃ المقال فی رؤیۃ الہلال" میں تحریر فرماتے ہیں:

"إذا ثبت الصوم أو الفطر عند حاکم تحت قواعد الشرع بفتوی العلماء أو عند واحد أو جماعة من العلماء الثقات ولاّهم رئیس المملکة أمر رؤیة الهلال، وحکموا بالصوم أو الفطر  ونشروا حکمهم هذا في رادیو، یلزم علی من سمعها من المسلمین العمل به في حدود ولایتهم، وأما فیما وراء حدود ولایتهم فلا بد من الثبوت عند حاکم تلک الولایة بشهادة شاهدین علی الرؤیة أو علی الشهادة أو علی حکم الحاکم أو جاء الخبر مستفیضاً، لأن حکم الحاکم نافذ في ولایته دون ما وراءها."

(زبدۃ المقال فی رؤیة الھلال بحواله  خیر الفتاوی، جلد: 4، ص:118، ط: مکتبة امدادیة)

جواہر الفقہ میں ہے:

"اور  جس طرح  ایک شہر کے قاضی یا ہلال کمیٹی کا فیصلہ اس شہر اور اس کے مضافات کے لیے واجب العمل ہے اسی طرح اگر کوئی قاضی یا مجسٹریٹ یا ہلال کمیٹی  پورے ضلع یا صوبہ یا پورے ملک  کے لیے ہو تو اس کا فیصلہ  اپنے اپنے حدود ولایت میں واجب العمل ہوگا۔"

(مسئلہ رؤیت ہلال ،ج:3،  ص:484،  ط:مکتبہ دارالعلوم کراچی)

فقط واللہ اعلم