سوال

میرے شوہر کا کارخانہ تھا،  کام نہ ہونے کی وجہ سے وہ بند ہو گیا تھا ، میرے پاس میرے کچھ ذاتی پیسے تھے جن کا میرے شوہر نے مجھے مالک بنا دیا تھا،  اور میں نے وہ پیسے حج کرنے کے لیے رکھے ہوئے تھے، تو میرے شوہر نے کہا کہ اب کارخانہ بنوانا ہے یا پھر آپ نے حج کرنا ہے؟ میں نے کہا کہ آپ کارخانہ بنوا لیں اور مجھے بعد میں حج کروا دینا۔ اس نےکہاٹھیک ہے،  (اور ایک بیٹے سےیہ بھی کہا کہ تمہاری امی کوایک حج کروانامیرے ذمہ ہے) کارخانے کاپہلا فلور چھت اور دوسرا فلور میرے پیسوں سے بنوایا گیا تھا۔ پھر میرے شوہر کا انتقال ہو گیا اور میرے شوہر مجھے حج بھی نہیں کروا سکے۔

اب سوال یہ ہے کہ کیا اس کارخانے میں میرا بھی حصہ ہے، یا سارا میرے شوہر کے ترکہ  میں شمار ہوگا ؟اور میرے دیے ہوئے پیسوں کا کیا بنے گا؟

جواب

صورتِ مسئولہ میں سائلہ نے جو رقم کارخانے کی تعمیر کے لیے اس شرط پر دی تھی کہ تعمیر کے بعد شوہر اسے حج کروائے گا، تو ایسی صورت میں یہ رقم شوہر کے ذمے قرض شمار ہوگی۔ شوہر کے انتقال کے بعد مذکورہ رقم اس کے ترکہ سے سائلہ کو ادا کرنا ضروری ہے۔ البتہ جس رقم سے کارخانہ تعمیر کیا گیا، وہ پورا کارخانہ شوہر کی ملکیت شمار ہوگا، جوکہ میراث کے شرعی ضابطہ کے مطابق تمام ورثاء میں تقسیم کیا جائے گا۔