کیا بیٹا جو کہ صاحبِ نصاب ہو اپنے والد کی زندگی میں اپنی شادی شدہ بہن کو زکوۃ کی رقم دے سکتا ہے یا نہیں ، اس کا کیا حکم ہے ؟
زکاۃ اس شخص کو دی جاسکتی ہے جو غریب اور ضروت مند ہو ، یعنی اس کی ملکیت میں اس کی ضرورتِ اصلیہ سے زائد نصاب (یعنی ساڑھے باون تولہ چاندی کی قیمت) کے برابر رقم نہ ہو ، اور نہ ہی اس قدر ضرورت اور استعمال سے زائد سامان ہو جس کی مالیت نصاب (ساڑھے باون تولہ چاندی کی مالیت) کے برابر بنتی ہے اور نہ ہی وہ سید ، ہاشمی ہو تو اس شخص کے لیے زکاۃ لینا جائز ہے، اور اس کو زکاۃ دینے سے زکاۃ ادا ہوجائے گی۔
صورتِ مسئولہ میں بہن اگر مستحق زکاۃ ہو تو اس کو زکاۃ دینا جائز ہے، بلکہ یہ زیادہ ثواب کا باعث ہے؛ اس لیے کہ اس میں صلہ رحمی بھی ہے۔ فقط واللہ اعلم
فتوی نمبر : 144209201132
دارالافتاء : جامعہ علوم اسلامیہ علامہ محمد یوسف بنوری ٹاؤن