سوال

 بینک میں نوکری کرنااور اس کی تنخواہ لیناجا ئز ہے یا ناجائز؟جب کہ مفتی یوسف لدھیانوی صاحب نے بینک میں نوکری کرنے اور اس کی تنخواہ دونوں کو ناجائز لکھا ہے اور مفتی شبیر صاحب مدرسہ شاہی مراد آباد نےبینک میں نوکری کرنے کو تو ناجائز،  لیکن اس پر ملنے والی تنخواہ کو جائز لکھا ہے،  دونوں میں سے کس کے قول کو اختیار کیا جائے؟  دلیل کی روشنی میں وضاحت فرمائیں مہربانی ہوگی!

جواب

موجودہ دور میں بینک  کی ملازمت ناجائز ہے، اور اس ملازمت کے نتیجے میں حاصل ہونے والی آمدن بھی ناجائز ہے، اس کی بنیادی طور پر دو وجوہات ہیں: 

(1) بینک کے اکثر معاملات  سودی لین دین اور غیر شرعی عقود پر مشتمل ہوتے ہیں، سودی لین دین کرنے والوں اور اس موقع پر گواہوں اور لکھت پڑھت کا حصہ بننے والوں پر رسول اللہ ﷺ نے لعنت بھیجی ہے، نیز قرآنِ مجید میں گناہ کے کاموں میں ایک دوسرے کے تعاون سے روکا گیا ہے، اور تعاون کی صورت میں عذاب سے ڈرایا گیا ہے، جب کہ بینک  میں ملازمت کرنے سے سودی اور ناجائز  معاملات و  غیر شرعی عقود   میں تعاون کرنا ، اس کی لکھت پڑھت کرنا اور گواہ بننا  لازم آتا ہے ؛ لہٰذا باعثِ لعنت کام کرکے، یا گناہ کے کام میں تعاون کرکے اس کی اجرت لینا کیسے جائز ہوسکتا ہے؟

(2) بینک  کی آمدن میں سود اور ناجائز منافع کا غلبہ ہوتاہے اور بینک اپنے  ملازمین کو تنخواہ سودی کمائی سے ادا کرتا ہے، جب کہ سودی رقم کسی سے لینے کے باوجود اس پر لینے والے کی ملکیت نہیں آتی؛ کیوں کہ ایک تو یہ حرام رقم ہے، دوسرا یہ کہ یہ اصل مالک کی ملکیت ہے، لہٰذا بذاتِ خود حرام رقم  اور دوسرے کی ملکیت سے رقم لے کر کسی کو دینے سے وہ حلال نہیں ہوگی۔

خلاصہ یہ ہے کہ بینک میں کسی بھی قسم کی ملازمت کرنا جائز نہیں ہے اور بینک کی ملازمت سے ملنے والی تنخواہ بھی ناجائز ہے۔

 قرآنِ مجید  میں سودی لین دین کو اللہ اور اس کے رسول ﷺکے ساتھ اعلان جنگ قرار دیاگیا ہے۔قرآنِ کریم میں ہے:

{یَا أَیُّهَا الَّذِیْنَ أٰمَنُوْا اتَّقُوْا اللّٰهَ وَذَرُوْا مَابَقِیَ مِنَ الرِّبوٰ إِنْ کُنْتُمْ مُّؤْمِنِیْنَ، فَإِنْ لَّمْ تَفْعَلُوْا فَأْذَنُوْا بِحَرْبٍ مِّنَ اللّٰهِ وَرَسُوْلِه}

ترجمہ:…’’اے ایمان والو! اللہ سے ڈرو اور جو کچھ سود کا بقایا ہے اس کو چھوڑدو، اگر تم ایمان والے ہو ، پھر اگر تم اس پر عمل نہیں کروگے تو اشتہار سن لو جنگ کا اللہ کی طرف سے اور اس کے رسول ﷺ کی طرف سے‘‘۔

[البقرۃ:۲۷۸،۲۷۹-بیان القرآن]

"عن جابر قال: لعن رسول اﷲ صلی اﷲ علیه وسلم آکل الربا، وموکله، وکاتبه، وشاهدیه، وقال: هم سواء".

(الصحيح لمسلم ، با ب لعن آکل الربا، ومؤکله، النسخة الهندیة، ۲/۲۷)

ترجمہ: حضرت جابر رضی اللہ عنہ  روایت کرتے ہیں کہ رسول اللہ صلی اللہ علیہ وسلم نے سود کھانے والے، کھلانے والے، سودی معاملہ لکھنے والے اور اس کے گواہوں پر لعنت فرمائی ہے۔ اور ارشاد فرمایا: یہ سب (سود کے گناہ میں) برابر ہیں۔

الدر المختار وحاشية ابن عابدين (رد المحتار) (6/ 55):

’’(لا تصح الإجارة لعسب التيس) وهو نزوه على الإناث (و) لا (لأجل المعاصي مثل الغناء والنوح والملاهي) ولو أخذ بلا شرط يباح

وفي المنتقى: امرأة نائحة أو صاحبة طبل أو زمر اكتسبت مالا ردته على أربابه إن علموا وإلا تتصدق به، وإن من غير شرط فهو لها: قال الإمام الأستاذ لا يطيب، والمعروف كالمشروط اهـ. قلت: وهذا مما يتعين الأخذ به في زماننا لعلمهم أنهم لا يذهبون إلا بأجر ألبتة ط‘‘.

فقط واللہ اعلم