سوال

اگر کوئی شخص اذان میں تکبیر اللہ اکبر کو 4 مرتبہ کہنے کے بجائے 2ہی مرتبہ کہے تو کیا اذان ہو جائے گی؟

جواب

صورت ِ مسئولہ میں  اگر  اذان کے درمیان یاد آجائے کہ تکبیر  دو مرتبہ کہی ہے اور دو مرتبہ  چھوٹ گئ ہے   تو  یادآتے ہی  دو مرتبہ تکبیر   کہے اور پھر   آخر تک اذان کے کلمات کا اعادہ کرلےاور اگر اذان دینے کے کافی دیر بعد یاد آئے کہ  دو تکبیر چھوٹ گئے ہیں تو  اس صورت میں دوبارہ اذان دینے کی ضرورت نہیں، اذان ادا ہوگئی ۔

فتاوی ہندیہ میں ہے :

"ويرتب بين كلمات الأذان والإقامة كما شرع. كذا في محيط السرخسي.

وإذا قدم في أذانه أو في إقامته بعض الكلمات على بعض نحو أن يقول: أشهد أن محمدا رسول الله قبل قوله: أشهد أن لا إله إلا الله فالأفضل في هذا أن ما سبق على أوانه لا يعتد به حتى يعيده في أوانه وموضعه وإن مضى على ذلك جازت صلاته كذا في المحيط".

(کتاب الصلاۃ،الباب الثانی فی الاذان ،ج:1،ص:56،دارالفکر)

فتاوی رحیمیہ میں ہے :

"سوال :اگر مؤذن فجر کی اذان میں "الصلاة خير من النوم"کہنا بھول جائے تو اذان صحیح ہوجائے گی یا دوبارہ دینا ضروری ہے ؟

الجواب:اگر اذان کے درمیان ہی یاد آجائے  تو جو کلمہ چھوٹ  گیا ہے وہاں سے آخر تک  کے کلمات کہہ کر  اذان پوری کرے اور اگر اذان پوری کرنے کے بعد یاد آئے تو غلطی درست کر  کےآخر تک  کلمات  کا اعادہ کرے ،اگر کافی وقت گزر جائے تو دوبارہ اذان دینا ضروری نہیں ".

(باب الاذان والاقامۃ،ج:4،ص:103،دارالاشاعت)

فقط واللہ اعلم