سوال

آیاتِ قرآنی اگر پھٹ اور ٹوٹ جاۓ تو  کس طرح تلف کریں؟ پلاسٹک کا بنا خانہ کعبہ کا دروازہ ٹوٹ گیا ہے جس پر آیات بھی لکھی ہیں، کینڈا میں پلاسٹک اور پیپر ری سائیکل ہوتا ہے، کیا ہم وہ ری سائیکل بن میں ڈال سکتے؟

جواب

واضح  رہے کہ قرآنِ مجید کے علاوہ دینی کتابوں کے اوراق جو قابلِ استعمال نہ ہوں ان سے قرآنی آیات، احادیث، اللہ تعالیٰ اور رسول اللہ ﷺ کے نام کو نکالنے کے بعد باقی اوراق کی ری سائیکلنگ کرکے  دوبارہ کاغذ بنا کر استعمال کرنا جائز ہے۔

البتہ قرآنِ مجید کے بوسیدہ اوراق یا طباعت کے بعد بچ جانے والے اضافی صفحات  کی یا اس پلاسٹک کی جس پر قرآنِ کریم کی آیات لکھی ہوں ری سائیکلنگ کرنا جائز نہیں ہے، کیوں کہ ری سائیکلنگ میں ان اوراق کو  پانی میں ڈال کو خوب گھمایا جاتا ہے، الٹ پلٹ اور ہیر پھیر کے بعد یہ مالیدہ اور برادہ بن کر  دوبارہ کاغذ یا پلاسٹک کی شکل میں ڈھلتا ہے (اس عمل کا مشاہدہ بھی کیا گیا ہے) اور قرآنِ کریم کی اس طرح ری سائیکلنگ کرنے میں اس کی بے ادبی اور بے توقیری لازم آتی ہے، اس لیے قرآنِ کریم کے اوراق کی یا اُس پلاسٹک کی جس پر قرآن کریم کی آیات لکھی گئی ہوں، ری سائیکلنگ کرنا جائز نہیں ہے، بلکہ اس کو کسی ایسی پاک  جگہ میں دفن کردیا جائے جہاں لوگوں کی آمد ورفت نہ ہو اور بے ادبی نہ ہو۔

الدر المختار وحاشية ابن عابدين (رد المحتار)(1/ 178):

"ومحو بعض الكتابة بالريق يجوز، وقد ورد النهي في محو اسم الله بالبزاق، وعنه عليه الصلاة والسلام: القرآن أحب إلى الله تعالى من السماوات والأرض ومن فيهن .

(قوله: ومحو بعض الكتابة) ظاهره ولو قرآنا، وقيد بالبعض لإخراج اسم الله تعالى ط.  (قوله: وقد ورد النهي إلخ) فهو مكروه تحريما؛ وأما لعقه بلسانه وابتلاعه فالظاهر جوازه ط. (قوله: ومن فيهن) ظاهره يعم النبي صلى الله عليه وسلم، والمسألة ذات خلاف والأحوط الوقف، وعبر بمن الموضوعة للعاقل؛ لأن غيره تبع له، ولعل ذكر هذا الحديث للإشارة إلى أن القرآن يلحق باسم الله تعالى في النهي عن محوه بالبزاق، فيخص قوله ومحو بعض الكتابة إلخ بغير القرآن أيضا، فليتأمل ط". 

 فقط واللہ اعلم