میرا سوال یہ ہے کہ جس طرح لڑکوں کا ختنہ ہوتا ہے،کیا اسی طرح عورتوں میں بھی ہوتا ہے؟ نیز عورتوں کے حوالہ سے مزید بھی بتائیں کہ کیا عورتوں کے لیے ختنہ کروانا درست ہے یا نہیں ؟
عورت کے ختنے کے بارے میں فقہاء کا اختلاف ہے، جیسے کہ فتاویٰ شامی جلد خامس (5) ، صفحہ نمبر (522) میں مذکور ہے بعض فقہاء اس کو سنت اور بعض مستحب کہتے ہیں اور اس پر سب متفق ہیں کہ اس کی کوئی تاکید نہیں ہے، ختنہ نہ کرانے میں کوئی گناہ یا ملامت نہیں ہے، ابو داؤد میں حدیث ہے کہ مدینہ طیبہ میں ایک عورت عورتوں کا ختنہ کیا کرتی تھی تو حضور صلی اللہ علیہ وسلم نے اس کو فرمایا تھا" لاتنهكي"یعنی ختنہ میں کھال زیادہ نہ کاٹا کرے۔ اور شامی میں ایک حدیث نقل کی ہے کہ حضور صلی اللہ علیہ وسلم نے فرمایا" ختان الرجال سنة و ختان النساء مكرمة" یعنی مردوں کا ختنہ سنت ہے اور عورتوں کا ختنہ مکرمت یعنی مردوں کی خوشنودی کے لیے ہے، مطلب یہ کہ مردوں کے ختنے کی طرح سنت مستقلہ مؤکدہ نہیں ۔(کفایت المفتی ، کتاب الختان و الخفاض، ج نمبر: 2،ص نمبر: 347، ط: دار الاشاعت)
فتاوی شامی میں ہے:
"و) الأصل أن (الختان سنة) كما جاء في الخبر (وهو من شعائر الإسلام) وخصائصه».....وختان المرأة ليس سنة بل مكرمة للرجال وقيل سنة
(قوله بل مكرمة للرجال)....وفي كتاب الطهارة من السراج الوهاج اعلم أن الختان سنة عندنا للرجال والنساء، وقال الشافعي: واجب وقال بعضهم: سنة للرجال مستحب للنساء لقوله - عليه الصلاة والسلام - «ختان الرجال سنة وختان النساء مكرمة."
(کتاب الخنثیٰ، مسائل شتی، ج:4، ص:751، ط:سعید)
فقط والله أعلم
فتوی نمبر : 144503102428
دارالافتاء : جامعہ علوم اسلامیہ علامہ محمد یوسف بنوری ٹاؤن