ایک شخص نے بینک اکاؤنٹ کھلوایا، اس کے علم ميں نہیں تھا کہ یہ سودی اکاؤنٹ ہے یا غیر سودی، کرنٹ ہے یا سیونگ، کچھ عرصہ بعد جب اس نے اکاؤنٹ میں موجود رقم نکلوائی، تو اُسے اضافی رقم اس میں دی جارہی تھی، سوال یہ ہے کہ اس اضافی رقم کا کیا حکم ہے؟
واضح رہے کہ بینک میں سیونگ اکاؤنٹ کھلوانا اور اس کا نفع لینا ناجائز اور حرام ہے، لہٰذا بینک میں سیونگ اکاؤنٹ نہ کھلوایا جائے اور اگر غلطی سے سیونگ اکاؤنٹ کھلوالیا ہے، تو اسے بند کروادیں، ضرورت کے لیے کرنٹ اکاؤنٹ کھلوانے کی گنجائش ہے، سیونگ اکاؤنٹ میں جو اضافی رقم آچکی ہے، وہ بغیر نیتِ ثواب فقراء و مساکین کو صدقہ کردیں۔
معارف السنن میں ہے:
"قال شیخنا: ویستفاد من کتب فقهائنا کالهدایة وغیرها: أن من ملك بملك خبیث، ولم یمكنه الرد إلى المالك، فسبیله التصدقُ علی الفقراء."
(ابواب الطهارة، ج:1، ص:95)
فقط والله أعلم
فتویٰ نمبر : 144704100017
دارالافتاء : جامعہ علوم اسلامیہ علامہ محمد یوسف بنوری ٹاؤن
