سوال

ہومیو پیتھک ادویات میں الکوحل ہوتا ہے،ان کا استعمال کرنا چاہئے؟

جواب

 "الکوحل" پر مشتمل ادویات کے متعلق تفصیل یہ ہے کہ   اس میں  دیکھا جائے گا کہ  اس میں  کس قسم کا الکحل استعمال کیا گیا ہے؟ اگر اس میں  کشمش منقیٰ، انگور یا کھجور سے حاصل کیا ہوا الکحل استعمال کیا گیا ہو تو   اس کا استعمال جائز نہیں ہو گا، الا یہ کہ اس کے علاوہ شفا کی کوئی صورت نہ ہو اور مرض ایسا شدید ہو کہ جان یا عضو کے تلف ہونے کا اندیشہ ہو اور مسلمان طبیب اس کو تجویز کرے  ۔

اور اگر مذکورہ  اشیاء کے علاوہ کسی اور چیز مثلاً جو، آلو، شہد، گنا، سبزی وغیرہ سے حاصل کیا گیا الکحل استعمال کیا گیا ہو  تو اگر  وہ نشہ کی حد تک نہ پہنچا ہو اور  مضر بھی نہ ہو تو اس کا استعمال جائز ہوگا، اور اگر نشہ کی حد تک پہنچ گیا ہو یا مضر ہو تو اس کا استعمال جائز نہیں ہوگا، البتہ مذکورہ  بالا شرائط کے مطابق استعمال کی گنجائش ہوگی۔

البتہ دواؤں میں عمومًا دوسری قسم کا الکحل استعمال ہوتاہے، اس لیے جب تک تحقیق سے ثابت نہ ہو جائے  کہ انگور وغیرہ سے کشیدکردہ الکحل استعمال ہوا ہے، دوا لینے کی اجازت ہوگی، البتہ یقین سے معلوم ہو کہ انگور وغیرہ مذکورہ چار چیزوں سے حاصل کردہ الکحل شامل کیا گیا ہے تو مذکورہ تفصیل کی روشنی میں دوا کے استعمال کا حکم ہوگا۔

فتاوی شامی میں ہے:

"وبه علم أن المراد الأشربة المائعة، وأن البنج ونحوه من الجامدات إنما يحرم إذا أراد به السكر وهو الكثير منه، دون القليل المراد به التداوي ونحوه كالتطيب بالعنبر وجوزة الطيب، ونظير ذلك ما كان سميًا قتالًا كالمحمودة وهي السقمونيا ونحوها من الأدوية السمية فإن استعمال القليل منها جائز، بخلاف القدر المضر فإنه يحرم".

( ‌‌كتاب الحدود، باب حد الشرب المحرم، (4 / 42)، ط: سعید)

فقط والله اعلم