سوال

شوہر نے اپنی بیوی سے یہ الفاظ کہے کہ ”اگر تم نےآئندہ میری بہنوں کی عزت کی یعنی میری بہنوں کو پوچھا یا ان کی باتوں کو اہمیت دی، مثلاً کھانے پینے کے بارے میں ان سے پوچھا، پانی وغیرہ کا خیال رکھا، یا گھر کے معاملات میں ان کی رائے کو فوقیت دی اور ان کے حکم کے مطابق چلی، یا ان کی باتوں کو ماننے لگو گی اور ان کے حکم پر چلو گی تو  تجھے میری طرف سے طلاق ہے“ اب اگر کبھی مستقبل میں اس نے میری بہنوں کی عزت کی تو کیا میری بیوی پر طلاق واقع ہو جائے گی یا نہیں؟ 

جواب

صورتِ مسئولہ میں شوہر نے جب اپنی بیوی سے یہ الفاظ کہے کہ  ”آئندہ اگر تو نے میری بہنوں کی عزت کی تو تجھے میری طرف سے طلاق ہے“ اور بہنوں کی عزت کرنے سے مراد شوہر کی  یہ تھی کہ    اگر میری بہنوں کو پوچھا یا ان کی باتوں کو اہمیت دی، مثلاً کھانے پینے کے بارے میں ان سے پوچھا، پانی وغیرہ کا خیال رکھا، یا گھر کے معاملات میں ان کی رائے کو فوقیت دی اور ان کے حکم کے مطابق چلی، یا ان کی باتوں کو ماننے لگو گی اور ان کے حکم پر چلو گی تو  تجھے میری طرف سے طلاق ہے“ تو  بیوی کی جانب سے شوہر کی بہنوں کی(اس طرح کی) عزت کرنے پر طلاق  معلق ہے، لہٰذا جب یہ شرط پائی جائے گی اور بیوی  شوہر کی بہنوں کی (مذکورہ بالا طریقہ پر)عزت کرے گی تو ایک طلاق رجعی واقع ہوجائےگی، پھر شوہر کی طرف سےعدت میں  رجوع کرنے پردونوں ایک ساتھ رہ سکیں گے، تاہم آئندہ کے لیے شوہر کو دو طلاقوں کا اختیار ہوگا۔