سوال

1۔بیعت کا یہ طریقہ کیسا ہے، ہمارے یہاں جب لوگ کسی پیر کے ہاتھ بیعت ہوتے ہیں تو پیر صاحب بیعت کراتے وقت اپنا پگڑی یا کوئی رسّی چھوڑ دیتے ہیں اور جو لوگ بیعت ہونا چاہتے ہیں وہ اس رسی یا پگڑی کو پکڑتے ہیں اور پیر صاحب جو کہتے ہیں لوگ بھی ساتھ ساتھ وہ الفاظ دہراتے  ہیں، رسی پکڑ کر بیعت ہونا کیسا ہے؟

2۔ یہ بھی مشہور ہے کہ اگر ایک بار کسی پیر کے پاس بیعت ہو گئے یا رسی ، پگڑی پکڑ کر انکے ساتھ الفاظ دہرا لئے تو اب دوبارہ کسی پیر کے پاس بیعت نہیں ہو سکتے،

کیا یہ صحیح ہے؟

جواب

1۔صورت مسئولہ میں پیر صاحب کا  پگڑی یا رسی پکڑوا کر بیعت کرنا درست ہے ۔

امداد المفتین میں ہے :

"سوال : یہاں ایک پیر لوگوں کو دور تک بیٹھا کر اپنی دستاران ان کے  ہاتھ میں پکڑا کر ایک سرا اپنے ہاتھ پکڑ کر یہ سب دستار کو مثل مصافحہ کے پکڑتے ہیں پھر مرید کرتا ہے ، جائز ہے یا نہیں ؟

جواب :یہ طریقہ مرید کرنے کا موافق شریعت ہے ۔"

(کتاب مایتعلق بالحدیث والسنہ ، ص: 212، ط: دارالاشاعت کر اچی )

2۔حضرت مولانا اشرف علی تھانوی رحمہ اللہ شریعت اور طریقت میں   تحریر فرماتےہیں:

" اگر کوئی شخص ایک شیخ کی خدمت میں خوش اعتقادی کے ساتھ ایک معتد بہ مدت تک رہے، مگر اس کی صحبت میں کچھ تاثیر نہ پائے تو اسے چاہیے کہ دوسری جگہ اپنا مقصود تلاش کرے، کیوں کہ مقصود خدا تعالٰی ہے نہ کہ شیخ، لیکن شیخِ اول سے بد اعتقاد نہ ہو، ممکن ہے کہ وہ کامل مکمل ہو، مگر اس کا حصہ وہاں نہ تھا۔  اسی طرح شیخ کا انتقال قبل حصولِ مقصود کے ہوجائے،  یا ملاقات کی امید نہ ہو ، جب بھی دوسری جگہ تلاش کرے اور یہ خیال نہ کر ے کہ قبر سے فیض لینا کافی ہے، دوسرے شیخ کی کیا ضرورت ہے،  کیوں کہ قبر سے فیضِ تعلیم نہیں ہوسکتا، البتہ صاحبِ نسبت کو احوال کی ترقی ہوتی ہے، سو یہ شخص ابھی محتاج تعلیم ہے، ورنہ کسی کو بھی بیعت کی ضرورت نہ ہوتی، لاکھوں قبریں کاملین بلکہ انبیاء کی موجود ہیں۔ اور بلا ضرورت محض ہوس نا کی سے کئی کئی جگہ بیعت کرنا بہت برا ہے، اس سے بیعت کی برکت جاتی رہتی ہے، اور شیخ کا قلب مکدر ہو جاتا ہے، اور نسبت قطع ہونے کا اندیشہ ہوتا ہے،  اور ہرجائی مشہور ہوجاتا ہے۔"

(باب سوم: تعلیمات،  ص :  382-383، ط: البشری) 

لہذا صورت مسئولہ میں اگر  پہلے شیخ  سے استفادہ  ممکن  نہ ہو، تو پہلے شیخ سے  تعلق منقطع کرکے کسی  متبع سنت  شخصیت سے اصلاحی تعلق قائم کرسکتے ہیں، بصورت دیگر متعدد افراد سے اصلاحی  بیعت کرنااصلاح نفس کے لیے مفید نہ ہوگا،نیز ایک مرتبہ کسی پیر سے بیعت ہونے کے بعد واقعی کسی شرعی وجہ کی بناء پر اس سے بیعت کا تعلق ختم کرکے کسی دوسرے متبع شرع سے بیعت ہونا چاہے تو یہ جائز ہے ۔

حضرت شاہ ولی اللہ محدث دہلوی رحمہ اللہ "القول الجمیل في بيان سواء السبيل" میں تحریر فرماتے ہیں :

" و أما المسئلة السادسة: فاعلم أن تکرار البیعة من رسول اللّٰه -صلی اللّٰه علیه وسلم- مأثور، وکذلك عن الصوفیة، أما من الشیخین فإن کان بظهور خلل فیمن بایعه فلابأس، وکذٰلك بعد موته أو غیبته المنقطعة واما بلاعذر فانه يشبه المتلاعب ويذهب البركة ويصرف الشيوخ عن تعهده."

(شفاء العلیل ترجمہ القول الجمیل، حکمت تکرار بیعت، جواب سوالہشتم، ص: 35، ط : رحمانیہ)

الحاوی الفتاوی للسیوطی میں ہے :

" مسألة: رجل من الصوفية أخذ العهد على رجل، ثم اختار الرجل شيخا آخر، وأخذ عليه العهد فهل العهد الأول لازم أم الثاني؟

الجواب: لا يلزمه العهد الأول ولا الثاني ولا أصل لذلك."

( كتاب الأضحية، باب جامع، مسائل متفرقة، 1 / 297، ط: دار الفكر للطباعة والنشر، بيروت-لبنان)

فقط واللہ اعلم