سوال

ایک بیٹی اور چار بیٹوں میں میراث کی تقسیم کا  شرعی طریقہ کار کیا ہے؟

جواب

اگر مرحوم کے ورثاء میں صرف ایک بیٹی اور چار بیٹے ہوں تو ان کے درمیان میراث کی تقسیم کا شرعی طریقہ کار یہ ہے کہ مرحوم کے کل  ترکہ میں سے حقوق متقدمہ (یعنی تجہیز و تکفین کا خرچہ، قرضہ کی ادائیگی اور تہائی مال میں سے وصیت کا نفاذ) نکالنے کے بعد باقی کل ترکہ کو ایک بیٹی اور چار بیٹوں کے درمیان اس طرح تقسیم کیا جائے گا کہ ہر بیٹے کو بیٹی کے مقابلہ میں دوگنا حصہ مل جائے، یعنی کل ترکہ کے نو حصہ کرکے اس میں سے ایک حصہ بیٹی کو اور دو، دو حصے ہر بیٹے کو دیے جائیں گے۔

فیصد کے حساب سے بیٹی کو 11.11 فیصد اور ہر ایک بیٹے کو 22.22 فیصد ملے گا۔ فقط واللہ اعلم