سوال

ایک شخص نے کہا کہ :”اگر میں نکاح کروں تو نکاح کے فوراً بعد میری منکوحہ پر طلاق ہوگی“، اب اگر مذکورہ شخص نکاح نہ کرے تو اس کے زنا میں پڑنے کا قوی اندیشہ ہے۔ شرعاً اس کا کیا حل ہے؟کیاوہ مذہب شافعی پر عمل کرسکتا ہے؟

جواب

صورتِ مسئولہ میں مذکورہ شخص کا یہ کہنا کہ ”اگر میں نکاح کروں تو نکاح کے فوراً بعد میری منکوحہ پر طلاق ہوگی“،  توایسی صورت میں احناف کے نزدیک اس مسئلہ کاحل یہی ہے کہ مذکورہ شخص جس لڑکی سےنکاح کرے گااس لڑکی سے  نکاح ہوتے ہی ایک طلاقِ بائن واقع ہوجائے گی، اس کے بعد  اگر مذکورہ شخص اسی لڑکی سے دوبارہ نکاح کرنا چاہے تو  نیا مہر مقرر کرکے نئے ایجاب وقبول کے ساتھ، شرعی گواہان کے سامنے دوبارہ تجدیدِ نکاح کرسکتا ہے ،البتہ آئندہ کے لیے مذکورہ شخص کے پاس دو طلاقوں کا اختیار ہوگا۔

فتاوی عالمگیریہ میں ہے:

"ألفاظ الشرط إن وإذا وإذما وكل وكلما ومتى ومتى ما ففي هذه الألفاظ إذا وجد الشرط ‌انحلت اليمين وانتهت لأنها تقتضي العموم والتكرار فبوجود الفعل مرة تم الشرط وانحلت اليمين فلا يتحقق الحنث بعده إلا في كلما لأنها توجب عموم الأفعال."

(كتاب الطلاق، الباب الرابع في الطلاق بالشرط ونحوه، ج:1، ص:415، ط:دار الفکر)

وفيه ايضاّ:

"إذا أضاف الطلاق إلى النكاح وقع عقيب النكاح نحو أن يقول لامرأة: إن تزوجتك فأنت طالق أو ‌كل ‌امرأة ‌أتزوجها فهي طالق."

(كتاب الطلاق، الباب الرابع في الطلاق بالشرط ونحوه، ج:1، ص:420، ط:دار الفکر)

فقط واللہ اعلم