سوال

میری شوہر کے ساتھ لڑائی ہوئی اور انہوں نے غصے میں کہا کہ:" میں طلاق دیتا ہوں ،میں طلاق دیتا ہوں ،میں طلاق دیتا ہوں" ۔

اب  ہم دونوں ساتھ رہنا چاہتے ہیں ۔اس کا کوئی طریقہ ہے ؟

جواب

بیوی کو ایک ہی مجلس میں تین طلاق دینا  ناجائز اور گناہ ہے، تاہم تین طلاق دینے سے تینوں واقع ہوجاتی ہیں ،    نکاح ختم ہوجاتا ہے،اور بیوی،  شوہر پر  حرمتِ مغلظہ کے ساتھ حرام ہوجاتی ہے،   تین طلاقیں دینے کے بعد  شوہر کے لیے رجوع کرنا یا دوبارہ  نکاح کرنا جائز نہیں ہے۔مطلّقہ  اپنی عدت (مکمل تین ماہواریاں اگر حمل نہ ہو، اور حمل کی صورت میں بچہ کی ولادت  تک ) مکمل کرکے  دوسری جگہ نکاح کرسکتی ہے۔

لہذا صورتِ مسئولہ میں جب سائلہ کے شوہر نے سائلہ کو لڑائی کے دوران تین بار ان الفاظ سے طلاق دی ہے کہ :"میں طلاق دیتا ہوں "، تو ان الفاظ سے سائلہ پر تینوں طلاقیں واقع ہوچکی ہیں، سائلہ اپنے شوہر پر حرمت مغلظہ کے ساتھ حرام ہوگئی ہیں، اب شوہر کے لیے بیوی سے رجوع کرنا یا اس سے تجدید نکاح کرنا جائز نہیں ہے ۔سائلہ اپنی عدت گزار کر دوسری جگہ نکاح کرنے میں آزاد ہوگی۔