سوال

ایک شخص نے اپنی والدہ کو کچھ سونا بصورت زیور گفٹ کیا تھا اور وہ سونا تمام اختیارات کے ساتھ والدہ کے حوالے بھی کیا تھا، والدہ اس کو استعمال کرتی رہی، پھر اس میں سے کچھ سونا والدہ نے اپنی زندگی میں اپنی بیٹیوں کو گفٹ کیا اور ہر ایک کو تمام اختیارات کے ساتھ حوالے بھی کیا، گفٹ کرنے والے کا تقریبا 25 سال پہلے انتقال ہو گیا۔

 اب اس شخص کی بیوہ اور بیٹے یہ کہہ رہے ہیں کہ ہمارے والد مرحوم نے اپنی زندگی میں اپنی والدہ کو جو سونا گفٹ کیا تھا وہ ہمیں واپس کر دیں، والدہ یعنی جن کو سونا گفٹ کیا گیا تھا ان کا انتقال ابھی ہوا ہے۔

 سوال یہ ہے کہ گفٹ کرنے والے کی بیوہ اور اس کے بچوں کا گفٹ کی واپسی کا مطالبہ کرنا کیسا ہے؟ جب کہ سونا آج سے تقریبا 30 سال پہلے گفٹ کیا گیا تھا۔

جواب

صورتِ مسئولہ میں اگر واقعۃً بیٹے نے اپنی والدہ کو سونا ہدیے کے طور پر دیا تھا اور اس کا قبضہ بھی دے دیا تھا تو ایسی صورت میں اس سونے کی مالکہ والدہ مرحومہ تھیں اور انہوں نے اگر وہ سونا اپنی بیٹیوں کو دیا تو وہ سونا والدہ کی ملکیت سے نکل کر ان کی بیٹیوں کی ملکیت میں داخل ہو گیا، اب اگر گفٹ کرنے والے کی بیوہ اور اولاد اس سونے کا مطالبہ کرتے ہیں تو ان کا مطالبہ کرنا شرعا درست نہیں ہے، ان کو اس مطالبہ کا کوئی حق نہیں ہے۔

فتاوی شامی میں ہے:

"(وحكمها ثبوت الملك للموهوب له غير لازم) فله الرجوع والفسخ."

(کتاب الهبة، ج:5، ص:688، ط:سعید)

فتاویٰ ہندیہ میں ہے:

"ليس له حق الرجوع بعد التسليم في ذي الرحم المحرم وفيما سوى ذلك له حق الرجوع إلا أن بعد التسليم لا ينفرد الواهب بالرجوع بل يحتاج فيه إلى القضاء أو الرضا."

(كتاب الهبة، الباب الخامس، جلد:4، صفحه:385، طبع: دار الفكر)

فقط واللہ اعلم